Siglir tar il cuntegn
Inhalt

Chantun Ils vegls decidan las votaziuns

Il Brexit na fiss betg vegnì acceptà sche la glieud sur 60 na vess betg pudì votar. La medema situaziun tar Donald Trump. Votantas e votants sut 60 han cler e net dà lur vusch a Hillary Clinton. Dentant datti adina dapli glieud sur 60 e quella va era pli regularmain a votar. Quai sa era la politica.

Bunamain mintga segund votant è 60+.
Legenda: Bunamain mintga segund votant è 60+. Keystone

La festa da 100 onns Pro Senectute a Cuira è vegnida visitada fitg bain. Plirs 100 pensiunaris èn stads preschents. Tranter tut la glieud era numerus politichers. Per els è quai ina buna pussibilità da mussar preschientscha e da rimar puncts tar la glieud pli veglia. La gruppa da vegliadetgna che po decider votaziuns.

Igl è impurtant da pudair plazzar noss arguments. La Pro Senectute è qua in fitg bun partenari da nus.
Autur: Christian Rathgebcusseglier guvernativ

La glieud daventa adina pli veglia. Avant 50 onns eran mo 10% da la populaziun Svizra sur 60. Oz èn gia 20% pli vegls che 60. Sch’ins excluda anc la populaziun sut 18, che na po anc betg votar, lura è mintga quart votant sur 60. Las cifras da l'Uffizi da statistica federal mussan che votants sur 60 van bler pli savens a votar che votants tranter 40-60 e schizunt bunamain dubel uschè savens sco votants sut 40. Uschia rivan la fin finala varga 40% da las vuschs tar votaziuns ed elecziuns da persunas sur 60. Quai vul dir sch’ins ha ils votants pli vegls, han ins era gia bunamain gudagnà la votaziun.

Legenda:
Cumportamaint da votants svizzers tenor vegliadetgna uffizi federal da statistica

La Pro Senectute na vul betg dominanza dals vegls

Nagin Brexit senza ils vegls. Nagin Donald Trump senza ils vegls. Ed era la partida populara dretga tudestga AFD na vessi betg dà senza las bleras vuschs dals vegls. Ils giuvens han numnadamain votà per gronda part exact il cuntrari.

Legenda:
Vuschs votaziun BREXIT tenor vegliadetgna en pertschient YouGov
Legenda:
Vuschs en pertschient tenor vegliadetgna: Trump vs. Clinton CNN

Che la Svizra ristga era da vegnir en ina situaziun dischagreabla tranter votants giuvens e vegls, quai sa era la nova presidenta da la Pro Senectute Eveline Widmer Schlumpf. Uschia vesa ella era questa problematica sco in dals gronds puncts da paisa. I na saja betg bun sche votants vegls decidian en lur agen interess a curta vista senza resguardar las consequenzas a lunga vista per ils giuvens.

Quai è ina da mias grondas finamiras. Puspè sensibilisar ils vegls da votar pli savens en favur dals giuvens. Els han lura era da viver cun las consequenzas.
Autur: Eveline Widmer Schlumpfnova presidenta da la Pro Senectute

Situaziun en Svizra anc betg uschè nauscha sco en auters pajais

Curdin Casaulta è il manader dal biro da la Pro Senectute a Glion. El è en stretg contact cun ils pensiunaris da la regiun. Tenor el è la solidaritad en Svizra anc fitg gronda. Ins pensia anc dapli vi dals auters. Dentant la lavur da sensibilisar e da patratgar vi da tuts saja fitg impurtanta. Vitiers na saja la situaziun betg culpa dals vegls. Era ils giuvens hajan da star tar lur responsabladads.

La solidaritad en Svizra è anc gronda. Dentant poss jau mo recumandar als giuvens dad era ir pli savens a votar.
Autur: Curdin Casaultamanader biro Pro Senectute Glion