Siglir tar il cuntegn
cuntegn

Chantun Ils pestgaders grischuns smanatschan cun in'iniziativa

L'uniun chantunala dals pestgaders pretendan dapli daners dal chantun.

In um preschenta sia tratga da peschs.
Legenda: La tratga da peschs pretenda bleras uras da lavur. Keystone

Dapli lavur ils ultims onns cun la tgira e la tratga dals peschs en il Grischun. Lavur che pretenda era adina dapli professiunalitad. Da quella lavur profiteschan era tut quels pestgaders che n'èn betg en ina uniun. E perquai pretenda l'uniun chantunala dals pestgaders dapli daners dal chantun.

Patenta da pestga è tschertgada

En il Grischun prendan 5’500 persunas la patenta da pestga, vitiers anc da quai da 3’000 be ina patenta emnila u dal di. Dentant, be 2’500 èn commembers da l'uniun chantunala. Ils blers che van a pestga en il Grischun sa schluitan da la lavur che vegn fatga per la pestga. Tgira e tratga da pestga saja millis uras lavur voluntaria, di il president da l'uniun chantunala, Rudolf Gerhard. Fissan tuts en ina uniun a pajassan la contribuziun annuala da fr. 10.- na duvrass’ins betg il sustegn dal chantun.

Cavigelli è dal maini ch'il chantun paja gia avunda

Tar il departament responsabel punctuescha il cusseglier guvernativ Mario Cavigelli, ch'il chantun paja gia passa 50'000.- francs l'onn a las secziuns da pestga, saja quai per indrizs per la tratga da pestga, litgiva ni era per scolar novs pestgaders. Far pajar dapli per la patenta (fr. 235.-), ina via che l'uniun chantunala numna. I na saja betg l'incarica dal chantun d'incassar contribuziuns per uniuns, di Mario Cavigelli. Sur da tschertas indemnisaziuns per prestaziuns explicitas possian ins discutar. Omaduas varts paran pia prontas per il dialog. Sch'i na dettia dentant betg ulteriurs daners dal chantun smanatschan ils pestgaders cun ina iniziativa dal pievel.