Ils investurs na stattan betg colonna...

Chattar insatgi ch'investescha en il turissem è grev – saja quai per il manaschi dad ina chasa plitost famigliara da trais stailas ubain per in cumplex da luxus cun 120 chombras. Tge èn las sfidas? A la tschertga dals investurs.

 Investider.

Legenda da maletgs: Andermatt Samih Sawiris davant ses project ad Ursera. Reuters

A Scuol datti per exempel l'areal Engadinerhof che spetga gia in mument sin in investur. Dentant ha bunamain mintga vischnanca in tal areal. Daco ch'investurs guntgeschan il Grischun, è per il capo da Scuol Christian Fanzun cler: Els spetgan giu las consequenzas da la crisa dal turissem, las consequenzas da la lescha da secundas abitaziuns e da l'aboliziun dal curs minimal da l'euro, avant investir memia blers daners.

E la vischnanca sezza na possia er betg investir daners, quai na fiss politicamain betg correct. Dentant ella sa guardar, che investiders potenzials hajan bunas premissas, per exempel cun accelerar la birocrazia necessaria. Pia resta tuttina il problem da chattar la persuna adattada ch'è pronta dad investir.

Chattar investurs professiunalmain

Investurs na creschan betg sin plantas. Dentant i dat els. Heinz Wehrle, anteriur hotelier a Lai ed a Scuol, lavura uss sco cussegliader ed ha exact quai sco professiun: El tschertga investurs. Ed el di er tge ch'in investur è insumma. La gronda part dals investurs èn numnadamain investurs instituziunals. Quai èn per exempel cassas da pensiun ch'administreschan noss daners. Investurs privats sco famiglias che s'interesseschan per la hotellaria èn be in tschintgavel da tut ils investurs.

Per chattar la dretga persuna per il dretg manaschi è la banca da datas da contacts da Wehrle indispensabla. El lavura tar Horwath, ina firma cun 700 biros e 30'000 collavuraturs en l'entir mund. I sa tracta dad ina firma che fa atgnamain cussegliaziuns da taglia, e quai saja la clav per vegnir tar la dretga persuna. Wehrle fa in exempel simplifitgà: «Nus avain uschè blers clients, sche jau less chattar insatgi per in hotel sper in lai ed jau sai che hotels sper lais èn en l'India gist in trend, dun jau in telefon a mes collega en l'India. Sche jau hai cletg, hai jau chattà il proxim investur.« Tar ils investurs privats saja bleras giadas er ina dumonda emoziunala da investir en in hotel u betg.

Bun ina mesa milliarda per Andermatt/Sedrun

I dat dentant er ils investurs che vegnan gist cun la bursa gronda. Per exempel Theo Ah Khing che ha investà en in singul hotel a Tschiertschen 15 milliuns francs ubain Samih Sawiris che ha investì ad Andermatt e Sedrun enfin uss bunamain ina mesa milliarda francs. Pertge ha el investì tant?

«Ad Andermatt na ha il terren custà quasi nagut, uschè poss jau metter si mes hotels e mes implant da golf e suenter vender el pli char», di l'investur egipzian. Ultra da quai haja el profità da quai che Andermatt n'eria anc betg enconuschent, «uschè hai jau pudì bajegiar si ina destinaziun senza renum, quai è adina bun». En il Tirol ubain en la Part Sura Bernaisa na fissia ses project betg stà pussaivel, là fiss il terren stà bler memia chars, «perquai ch'enfin che l'entir project è finì passan onns nua che quai terren na porta betg tschintg raps.»

La Svizra saja dal reminent er in bun lieu per plazzar daners, aschunta Sawiris. «Qua n'è la ristga betg gronda che quai dat tuttenina in putsch ubain che l'euro custa tuttenina 6 francs.» El, che fa bilantscha das ses project ad Andermatt pir cura che quel è propi a fin, na fa pia anc betg tants quitads pervia da la crisa da l'euro.

Pli gugent en in hotel che sin banca?

A possessurs che n'han probablamain betg tants daners per investir sco Samih Sawiris fa l'euro dentant schon mal il venter. Sch'ils hosps mancan, mancan numnadamain er ils daners per investiziuns. Ed insumma, vender in hotel da famiglia, è betg simpel. «Il trend è adina pli fitg da cumprar chasas grondas cun bleras chombras, er en il Grischun», di l'expert d'immobiglias Gian Derungs. Quai senta er Sepp Waldegg da Savognin. El fiss gia dapi trais onns en pensiun, vegn dentant betg da vender ses hotel Piz Mitgel. Ina chasa da lunga tradiziun turistica cun 30 chombras. Armin Casutt da Falera è da l'auter maun. El ha investì en in hotel a Falera, «jau na sun mai stà in che ha laschà ils daners sin banca. Sche nus na cartain betg en noss turissem, tgi lura?», di el.

RR actualitad 12:00