Siglir tar il cuntegn
Inhalt

Chantun Ils Grischuns duain viver pli saun

La populaziun grischuna duai daventar pli conscienta da las valurs da la sanadad, e viver a moda pli sauna. Il chantun ha per quai intent elavurà in model directiv.

Ina maisa cun fritgs e verduras anc pachetadas.
Legenda: Ils Grischuns duajan viver pli saun. Keystone

Il chantun Grischun vul favurisar che ses abitants vivan pli saun. Il Departament per giustia, segirezza e sanadad ha elavurà in model directiv che duai promover la sanadad e la prevenziun. Quest model sa drizza a tut ils avdants dal Grischun, ma er a patruns da lavur, a persunas ch'èn engaschadas en la promoziun da la sanadad ed en la prevenziun, ed a commembers da las autoritads.

Franar ils custs da sanadad

In cumportament conscient possia gidar ad impedir u almain a retardar che malsognas cronicas, betg transmissiblas possian sa sviluppar. Uschia duaja vegnir franà l'augment dals custs en il sectur da la sanadad. Las malsognas betg transmissiblas chaschunan oz en Svizra circa 80% dals custs da sanadad directs da 77,8 milliardas francs (2015).

En il chantun Grischun importan ils custs da sanadad directs correspundentamain circa duas milliardas francs u circa 10'000 francs per abitanta u abitant ad onn. Perquai ch'il dumber d'umans attempads crescha, vegnan er a s'augmentar las malsognas betg transmissiblas sco cancer, diabetes, malsognas dal cor e da la circulaziun e demenza. Correspundentamain ston ins far quint ch'ils custs da sanadad directs vegnan er a crescher, senza prender cuntramesiras, tenor il departament.

Plinavant scriva il chantun che la sanadad na dependia betg mo da l'agen cumportament. Consequenzas per la sanadad hajan era las cundiziuns da basa che vegnian influenzadas da persunas da la politica, da l'economia ed al plaz da lavur.

RR novitads 10:00