Siglir tar il cuntegn
Inhalt

Chantun Ils giasts russ mancan

La stagiun d'enviern 2013 ha l'Engiadin'Ota anc pudì nudar 20 pertschient dapli pernottaziuns da giasts or da la Russia. La mancanza da giasts na po dentant er betg vegnir curregida questa stagiun.

Ils Russ a San Murezzan.
Legenda: Ils Russ a San Murezzan. RTR

Da quai da 19'000 pernottaziuns da giasts or da la Russia ha quai dà il schaner 2013 en l'Engiadin'Ota. Il 2015 èn quai stadas 20 pertschient pli paucas. Per il schaner dal 2016 na spetga la destinaziun Engiadina San Murezzan betg meglras cifras.

«Russ giaudan incrediblamain»

Ils giasts or da la Russia èn cun trais fin quatter pertschient durant la stagiun d'enviern bain mo ina pitschna part da tut ils giasts en Engiadin'Ota, els sajan però giasts che consumeschian bain. En quest senn è s'exprimida la scheffa da l'organisaziun turistica Engiadina San Murezzan, Ariane Ehrat envers il schurnal regiunal dal Grischun dad SRF.

Il problem per turists or da la Russia saja il rubel flaivel. Quai conferma il schef da la partiziun «martgads» da Svizra Turissem, Urs Eberhard. Cun las sancziuns dals pajais dal vest envers la Russia e cun il pretsch bass da l'ieli sin il martgà internaziunal è la valuta russa vegnida sut squitsch ed ha pers valita. La Svizra è vegnida en relaziun anc pli chara.

Ils Russ a San Murezzan.
Legenda: Er quest onn na vegnan ils giasts da la Russia betg a San Murezzan. RTR

Ambassadurs per ils fitg bainstants

L'organisaziun turistica da la confederaziun Svizra Turissem vesa il problem dals giasts che mancan.

Far reclama cun campagnas da televisiun u placats, na saja betg la dretga via en la situaziun actuala, manegia Urs Eberhard da Svizra Turissem. L'organisaziun turistica metta plitost sin «ambassadurs» per il turissem en Svizra. Persunas or da la Svizra enconuschentas duain pledentar giasts pussaivels e carmalar els en Svizra.

En mira ha Svizra Turissem persunas fitg bainstantas, sco Urs Eberhard di. Ins focuseschia sin persunas che vulan era vinavant sa prestar la Svizra.

Dar appreziaziun

Il temp ferm dals giasts or da la Russia è l'emna da festas suenter l'onn nov. Nadal da la baselgia ortodoxa russa è ils 7 da schaner. En quels dis dettian ins spezialmain stima als giasts russ en l'Engiadin'Ota. Quai sincerescha la scheffa da la destinaziun Engiadina San Murezzan, Ariane Ehrat, envers ils schurnal regiunal dal Grischun. Tranter auter dettia quai aperos da schampagn cun vodka.