La gronda sfida è la punt dal Lavoitobel
Auter è quai tar il plazzal a Tumein, nua che la punt dal Lavoitobel vers la Surselva vegn renovada. Roger Stäubli dal uffizi da construcziun bassa numna quest plazzal schizunt “pièce de résistence”. Passa 11’000 vehichels passan questa punt di per di. Dal chantun anora veglian ins surtut evitar ch’ils autos guntgeschian tras il vitg da Tumein.
Divers plazzals en la Surselva
Quitads fan ins era che la colonna pudessi tanscher enfin l’access da l’autostrada. Impedir quai vulan ins cun laschar reglar manual il traffic cura ch’i ha bler vehichels sin via. I è en mintga cas da quintar cun dapli temp sin quest tschancun.
Ils ultims onns hajan ins tenor Roger Stäubli in pau tralaschà la via tras la Surselva pervi da mancanza da daners. Perquai dettia actualmain blers plazzals en la vallada. In da quels è sin la via a Lumneins avant Trun.
Mo era tranter Sumvitg e Mustér vegnan las lavurs da renovaziun vid la punt cuntinuadas. Il medem vala per la via tranter Rabius e Sumvitg. Là vegn cumenzà cun la construcziun da la punt. Per gronda part na tangheschia quai tenor Stäubli betg il traffic.
2 gronds plazzals en Engiadina
En l’Engiadina vegn tranter auter finì la davosa etappa da la via tranter Lavin e Giarsun. Là vegn construì ina punt. In’auter grond plazzal è tranter Giarsun ed Ardez. Quest project cuzza anc plirs onns. Actualmain vegn bajegià la punt da Magnacun che sa chatta en ina zona geologicamain difficila.