Il chantun na sustegna betg pli la producziun dal «Spick» rumantsch finanzialmain. En ina fasa iniziala da quatter onns ha el pajà 130'000 francs l'onn. Uss fiss el bain pront da pajar vinavant, dentant betg ina summa uschè auta. Il conto da la promoziun da la lingua duai esser avert era per auters projects. Il «Spick» avess stuì vegnir finanzià cun contribuziuns dals abunaments, dentant ils abunents mancan.
150 enstagl da 400 abunents
Quintà aveva il «Spick» cun enfin 400 abunents. Uss èsi dentant be 150 abunents. Roger Hartmann, il manader dal «Spick», haja bain empruvà da chattar auters donaturs, per exempel la Ems Chemie ubain la Banca chantunala.
I saja dentant «fitg grev da chattar insatgi che dat plirs millis francs be per 150 abunents», di Hartmann.
Era la Lia Rumantscha ceda
Er la Lia Rumantscha na possia betg dar dapli daners. Er ella contribuiva 90'000 francs l'onn per il «Spick» rumantsch. Dapli daners na rendian betg per uschè paucs abunents, di Urs Cadruvi, il secretari general. El crai, che la raschun per uschè paucs abunaments saja, ch'il «Spick» n'è betg cumparì be en in idiom, mabain sco maschaida da tut ils 5 idioms e rumantsch grischun.
Ils abunents dal «Spick» rumantsch survegnan davent dal favrer 2016 il «Spick» per tudestg, sch'els vulan salvar vinavant l'abunament.
RR novitads 06:00