Siglir tar il cuntegn
Inhalt

Chantun Il pli ditg stattan ils giasts en il Grischun

En tut han ils manaschis en il Grischun dumbrà 4'627'447 pernottaziuns. Quai communitgescha l'Uffizi per economia e turissem dal Grischun. Quai èn 1,9% pli pauc che l'onn avant. Cun ina durada da dimora d'en media 2,7 notgs restan ils giasts pero il pli ditg en ils hotels grischuns.

blera glieud avant l'entrada dal hotel Waldhaus Flem
Legenda: Malgrà l'avertura dal hotel Waldhaus Flem ha la destinaziun Flims Laax nudà 5,1% damain pernottaziuns. Keystone

Il Grischun ha 90'000 pernottaziuns pli pauc ch'il 2015. Sulet la Part Sura Bernaisa ha ina reducziun anc pli gronda (-91'000 u -2,4%). Las pli grondas perditas da pernottaziuns han nudà Val Son Pieder (-11.8%) e la regiun Savognin Beiva Alvra (-11.6%). I dat dentant era regiuns cun in augment da pernottaziuns. Ils pli gronds en la Surselva (+6,4%) ed il Puschlav (+6,2%). Er dapli pernottaziuns han registrà il Partenz (+4.6%) e la destinaziun Engiadina Bregaglia (+3.0%).

Legenda:
Pernottaziuns en Grischun: Cliccar sin ils onns per activar e deactivar las lingias per cumparegliar las pernottaziuns da differents onns. ORIGINAL Quai è il diagram cun tut las cifras - mo duvrar per retschertgas Cifras da l'Uffizi federal da statistica (2005-2018)

Cifras stabilas en la Svizra

La hotellaria svizra ha registrà l'onn passà 35,5 milliuns pernottaziuns. Quai èn 0,3% pli pauc ch'il 2015. Il motiv è en spezial ch'ils giasts da l'exteriur n'èn betg vegnids. Turists da l'exteriur han fatg 19,3 milliuns pernottaziuns (-1,5%). Quai communitgescha l'Uffizi federal da statistica. En spezial tar ils giasts da l'Asia hai dà ina reducziun da 3,4%. Sa sminuì fermamain è il dumber da giasts da la China (-18%).

Legenda:
Pernottaziuns - cifras annualas dapi 2005 Uffizi federal da statistica (UST)

Occupaziun da las chombras

Il 2016 eran las chombras da hotels svizzers occupads en media per 51,3% (2015:51,5%). Tranter las regiuns turisticas ha Genevra mussà la pli auta occupaziun cun 63,5%. Segund ferma regiun areguard quai è Turitg cun 63%. Il Grischun ha registrà ina quota da 46,2% (2015: 46,7%). La regiun turistica Grischun dumbra en total 609 manaschis averts che han a disposiziun 18'236 chombras.

Giasts stattan il pli ditg en il Grischun

En media han ils giasts pernottà il 2016 duas giadas, tuttina sco il 2015. Giasts esters han pernottà en media 2,1 notgs, ils giasts svizzers 2,0 notgs. Il pli ditg han ils giasts pernottà en il Grischun. En media 2,7 notgs. Il Vallais ha registrà en media ina durada da dimora da 2,4 notgs. Il pli pauc ditg han ils giasts pernottà en la regiun Fribourg (1,6 notgs).

RR novitads 10:00