Siglir tar il cuntegn
cuntegn

Chantun Il Museum d'art Grischun va da Castasegna fin a Zug

Il Museum d’art dal Grischun ha preschentà oz ses program per l’onn 2015. Cun quai ch’il museum vegn il mument bajegià enturn, han ins stuì chattar ina soluziun.

Dretg: Stephan Kunz, il directur dal Museum d’art dal Grischun. Sanester: Nicole Seeberger, la collavuratura scientifica.
Legenda: Stephan Kunz, il directur dal Museum d’art dal Grischun e Nicole Seeberger, la collavuratura scientifica. RTR, G. M. Maissen

La soluziun dal Museum d'art dal Grischun è: ir sin viadi. Uschia vegnan las ovras dad Alois Carigiet preschentadas en il Museum naziunal a Turitg. Ensemen cun ovras dad Alois Cariget ch’èn normalmain en auters museums duai uschia dar ina vasta exposiziun. In dals puncts culminants è segir era l’exposiziun en il museum d’art a Zug. Là mussa il Museum d’art dal Grischun passa 100 objects. Uschia ha in auter public ina giada la pussaivladad da vesair objects ch’èn normalmain per gronda part en il Grischun.

Era en il Grischun differentas exposiziuns

Dasper in’exposiziun davart l’art da ed or da la Val Lumnezia, che ha lieu durant la stad a Lumbrein, datti era ina exposiziun da fotografias a Castasegna. Era a la staziun da Cuira ha lieu ina pitschna exposiziun. Sin ina part dals indrizs da placats che mussan normalmain reclamas, vegn quest on mussà art. Mintga mais duai dar novs placats che duajan far studegiar e discutar ils passants.