Il hype dal glatsch nair

Ins vesa massa fotografias da lais schelads. Ils lais en il Grischun èn cuverts cun glatsch nair. Uffants, geniturs, nonas e nons – mintgin è fascinà dal fenomen da la natira.

Laschar ir video «La fascinaziun dal glatsch nair»

La fascinaziun dal glatsch nair

2:25 min, Telesguard dals 19.12.2016

Il video mussa impressiuns dal lai da Lai. Dentond, saja quai il lai da Lai, il Lago Bianco sin il pass dal Bernina ni il lai dad Arosa tuts – sa mussan da la pli bella vart.

«  Jau ma sent sco Superman. Igl è sco sche jau savess chaminar sur l'aua. »

uffant dad Arosa
hockeyan passiunà

Sil glatsch nair ad Arosa

Cun far ina visita al glatsch nair ad Arosa ves'ins, che la glieud ha il plausch. Uffants giogan hockey, fan piruettas e fan cursas si e giu per il glatsch ed era ils geniturs fan lur rundas sin il glatsch. Cun charrotschas e chauns spassegian indigens e turists sin il glatsch.

In'offerta supplementara

Ils turistichers nizzegian il glatsch nair per offertas spezialas – sco per exempel ir cun patins da glina plaina.

«  Nus pudain nizzegiar il glatsch nair sco offerta supplementara. Divers giasts van avantmezdi cun ils skis e suentermezdi cun ils patins. »

Pascal Jenny
Directur da la destinaziun da turissem Arosa

Sche la naiv manca è il glatsch nair in’alternativa attractiva, di il directur da turissem d’Arosa Pascal Jenny. I saja er in eveniment che fa endament memorias da pli baud tar giasts ed indigens.

Nettegiar il glatsch nair

Cun duvrar il glatsch nair datti ina vetta alva sin il glatsch, e uss che i ha anc dat naiv sin il glatsch pudessi esser passà cun patinar sin glatsch propi nair. Perquai studegia Pascal Jenny da nettegiar il glatsch. L’idea foss, che var 20 persunas duain nettegiar il glatsch a man per pudair garantir il glatsch nair anc pli ditg.

Actualitad 12:00




Laschar ir video «Arosa ha puspè glatsch nair ... quasi nair»

Arosa ha puspè glatsch nair ... quasi nair

1:03 min, Actualitad video dals 22.12.2016