Il Grischun haja quintà cun il chanaster da Turitg

Che la citad da Turitg na vul betg sa participar ad ina candidatura per gieus olimpics n’è betg ina terrada. Il Grischun resta en contact cun Turitg.

Laschar ir video «Malgrà il «na» da Turitg resta la regenza optimistica»

Malgrà il «na» da Turitg resta la regenza optimistica

2:39 min, Telesguard dals 7.6.2016

Il comité haja quintà cun la decisiun da la citad da Turitg, di Andreas Wieland, il mainaproject per la candidatura envers RTR. Il na da Turitg munta tenor el che Turitg na sa participescha betg a la lavur da concept. Per sustegnair eventuals gieus olimpics na sajan dentant las portas betg serradas, di Wieland vinavant.

Sco raschun per il na inditgescha il cussegl da la citad che sias pretaisas per ina cooperaziun na sajan betg ademplidas. Uschia na saja per exempel betg cler sche Swiss Olympic giavischia insumma la participaziun da Turitg. Plinavant saja il temp per ina candidatura cumpetitiva stgars.

L'emna passada aveva la regenza grischuna inoltrà sia candidatura per la procedura da nominaziun svizra. Medemamain en quest'emna aveva decis il cussegl da citad da Turitg.

Grischun resta en contact cun Turitg

Malgrà la decisiun negativa da la citad da Turitg areguard ils gieus olimpics il 2026 en il Grischun vul il directur dal departament d’economia dal Grischun Jon Domenic Parolini restar en contact cun la citad ed il chantun Turitg. Quai scriva l’agentura da novitads sda.

La regenza dal chantun Turitg è però en cumparegliaziun cun la citad sa mussada pli averta per ina pussaivla candidatura per ils gieus olimpics il 2026 communabel cun il Grischun.

Inoltrà a Swiss Olympic èn vegnidas dasper la candidatura dal Grischun anc 4 ulteriuras candidaturas.

RR novitads 14:00