Siglir tar il cuntegn
Inhalt

Chantun Il Grischun ha avunda pumpiers

La situaziun actuala en il chantun è cuntentaivla: «En il Grischun avain nus nagin corp da pumpiers ch’è ferm sut il dumber ch’el sto avair». Quai di Roland Farrer, il president da l’Associaziun da pumpiers Grischuns.

In pumpier da Cuira stizza in fieu en il Sennhof l'onn 2012.
Legenda: In pumpier da Cuira stizza in fieu en il Sennhof l'onn 2012. RTR, F. Belotti

Tenor Roland Farrer dependia quai adina, tge ch’il cader fetschia per recrutar nov persunal. Era saja quai en ils centers pli simpel da recrutar novs pumpiers. Cuira haja cun 37’000 abitants era gia gì fadia d’occupar ils 80 posts da pumpiers, entant che Mut e Val n'hajan nagina fadia da chattar lur pumpiers.

Roland Farrer durant l'intervista cun il Radio Rumantsch.
Legenda: Roland Farrer durant l'intervista cun il Radio Rumantsch. RTR, F. Belotti

Il corp da pumpiers Alvra, nua che Roland Farrer è cumandant, haja per exempel gì grond success ils davos dus onns. Uschia sajan l’onn passà entrads 10 novs pumpiers en il corp e quest onn saja quai stà 17 novs commembers. Impurtant saja surtut da persvader ils giuvens, avant che quests s’engaschian dapli en auters lieus. Uschiglio n'hajan els nagina peda pli per ils pumpiers. Proximamain cumpara ina enquista, che tracta tranter auter il dumber dals pumpiers.

Scolas visitan il center Pantun

Enfin ils 7 d’october visitan circa 2’200 scolaras e scolars da la 5avla e 6avla classa primara il center da scolaziun Pantun, nua che la lavur dals pumpiers vegn mussada. Quai sajan impurtants dis, per pli tard chattar avunda pumpiers, manegia Roland Farrer, il president da l’Associaziun da pumpiers dal Grischun.

RR actualitad saira 17:00