La sonda passada ha l’Archiv da cultura da dunnas dal Grischun organisà in omagi per Elly Koch, en la sala dal Marsöl a Cuira, cun in’exposiziun da lavurs da pitg da crusch, fatgas tenor ses musters.
Musters cun impurtanta rolla
Il pitg da crusch ha ina gronda tradiziun en il Grischun. Dunnas surcusivan chaussas spezialas, sco plimatschs da batten, dentant era chaussas dal mintgadi, sco cuvertas da maisa. Ina rolla impurtanta giugavan ils musters, di Silke Redolfi, la manadra da l’Archiv da cultura da dunnas dal Grischun.
Ils motivs possedevan ina simbolica profunda. Il liun per fermezza, il cot per attenziun, il tschierv per la vitalitad. En temp d’auta mortalitad d’uffants, da malsognas e fomaz giugavan simbols da forza ina rolla impurtanta.
Fascinaziun da musters
Elly Koch era fascinada da la varietad dals musters grischuns, dal linguatg da las furmas e da la muntada. Quai chattian ins sulettamain en il chantun Grischun. Uschia è ella ida a la tschertga dals musters, en l’entir chantun Grischun. Cun ses cudeschs da pitgs da crusch ha Elly Koch conservà e promovì in artisanadi ch’ì dat dapi tschientaners en il Grischun.
Ils pitgs da crusch sajan ina part da l’istorgia dal Grischun, da la cultura da las dunnas, di Silke Redolfi.
