La populaziun da la Svizra ha er consumà pli pauc vin l'onn 2016. Il consum è sa reducì da 42 buttiglias sin 40 buttiglias per persuna. Dapi l’onn 1971 vegn onn per onn bavì pli pauc vin en Svizra. Motivs per quest trend èn grevs da chattar. La concurrenza da l’exteriur, leschas pli rigurusas (0.5‰) sco era dapli prevenziun èn motivs pussaivels. Dentant èn quai tut mo ipotesas.
La pli pitschna consumaziun da vin n'ha nagin effect sin la vendita da vin grischun.
Tenor Hansruedi Guntli, manader da la chasa da vin Cottinelli SA, saja sulettamain sa midada la moda e maniera da la vendita. I vegnia ozendi vendì pli char vin, e quai egualiseschia il quint final. Plinavant saja da vin grischun avant maun paucas quantitads. E quai simplifitgeschi la vendita.
La pitschna quantitad e la buna qualitad – quai fa or il vin grischun. I sa tracta dad in vin fitg tschertgà che n'ha betg problems da vendita.
RR actualitad 12:00
