Siglir tar il cuntegn
Inhalt

Chantun Il center politic collia las glistas

En vista a las elecziuns federalas da l'october 2015 han las partidas chantunalas da la PBD, PCD e PLD decidì da far ina colliaziun da glistas. Cun lur giuvnas partidas correspundentas resp. cun las segundas glistas fan la PBD, PCD e PLD sutcolliaziuns da glistas.

Ils logos da la PLD, PCD e PBD.
Legenda: Las trais partidas collian lur glistas per las elecziuns 2015. RTR

Cun far quest pass demussan las partidas l'intenziun da vulair rinforzar il bloc dals burgais ed il center politic. Eventualas vuschs restantas duain ir en favur dals partenaris d'allianza.

Cun questa colliaziun reageschan las partidas er al fatg che la colliaziun da glistas da la PS, dals Verds e da la PVL aveva manà avant quatter onns a la perdita dal sez da la PLD.

Las trais partidas recumondan ultra da quai da reeleger ils cussegliers dals chantuns d'enfin ussa Stefan Engler (PCD) e Martin Schmid (PLD).

PPS deplorescha

La partida populara dal Grischun ha prendì enconuschientscha che las partidas dal center sajan sa decididas cunter ina politica economica ferma. La partida communitgescha ch'ella deplorescha quai. Ina colliaziun da glista da questas trais partidas cun la PPS avess pudì stgaffir a Berna ina ferma represchentanza da l'economia ed industria grischuna scriva la partida.

Plinavant remartga ella che la PPS grischuna na saja betg explicitamain visada vi sin colliaziuns da glistas. En vista a las sfidas economicas e turisticas haja la partida purschì il maun per ina gronda colliaziun.

Uniun tetgala da l’economia grischuna beneventa la colliaziun

L'Uniun tetgala da l'economia grischuna beneventa la colliaziun da glistas da las partidas dal center. La finamira da l'Uniun saja che las partidas burgaisas gudognian enavos il quart sez a las elecziuns dal Cussegl naziunal quest atun. Cun far quest pass tirian la BDP, la PCD e la PLD las consequenzas ord il sbagls da las davosas elecziuns il 2011, uschia scriva l'Uniun tetgala. Uss saja pussaivel da gudagnar enavos il sez ch'ins haja lura pers als verd-liberals.

Verd-liberals avessan era gugent fatg part a la colliaziun

Las partidas grischunas dal center collian lur glistas per las elecziuns naziunalas e da la vart resta la Partida Verd-liberala.

Ils Verd-liberals avessan gugent fatg part a la colliaziun da la PCD la PDB e la PLD. Quai ha ditg il president Christian Stricker a Radiotelevisiun Svizra Rumantscha. Ussa dettia anc la pussaivladad da sa colliar cun ils Socialdemocrats. Ir ensemen cun la Partida populara na vegn tenor Stricker betg en dumonda.

RR novitads 16.00