Dapi insaquants onns saja il basegns da segirtad a Cuira s'augmentà considerablamain. Il motiv sajan ils auts dumbers da fugitivs che sajan responsabels per ina situaziun da segirezza instabila en l'Europa. Cunzunt las numerusas attatgas da terror ed acziuns dad amoc chaschunas gronda malsegirtad.
Adattar als basegns
Era sche Cuira è vinavant ina da las citads las pli segiras da la Svizra hajan ils eveniments en ils pajais vischins in'influenza sin lur lavur, ha il cumandant da la polizia da citad da Cuira Ueli Caluori communitgà. Uschia stoppia il corp da polizia constantamain adattar lur scolaziun, equipament e meds d'engaschament als basegns actuals.
Vesaivlas sajan mesiras da segirtad supplementaras per exempel vegnidas tar la Festa da Cuira. Là aveva la polizia montà elements da betun ed era preschenta cun armas.
Pli pac respect envers la polizia
Las incumbensas principalas restan dentant sumegliantas. Dasper il consum exagerà d'alcohol haja la polizia er da sbatter adina dapli cun attatgas verbalas e fisicas envers la polizia. Perquai vegnia l'atgna protecziun adina pli impurtanta tar acziuns.
RR novitads 18:00