La trilinguitad, las differentas confessiuns ed era ch'igl n'è betg stà uschia simpel da tgirar il contact tranter las valladas grischunas eran da quest temp aspects che hajan bunamain provocà in tschert spiert da cuminanza.
Quai manegia la musicologa Laura Decurtins che sa fatschenta cun l'istorgia ed il svilup dal chant en il Grischun. La vita d'uniun era perquai quella giada in bun med per chattar la cuminanza ed unir il pievel, di Decurtins.
Migrants tudestgs han lantschà il chant
La cultura da cant e musica saja arrivada en il Grischun entras ils emigrants da lieunga tudestga. Quai eran musicists u magisters che hajan chattà la via a Cuira sco magisters da la scola chantunala. Quels hajan lura inizià il moviment musical. Perquai n'èsi pauc surprendent, ch'ils emprims chors grischuns èn vegnids fundads en la vallada dal Rain grischuna sco a Maiavilla, Tusaun, Igis, Jenins u Cuira.
Da Cuira anora è il chant da chors virils e maschadads s'extendì en las valladas. Suenter ch'il pli vegl chor grischun, il chor viril da Maiavilla, è vegnì fundà l'onn 1828, è la scena cantica en il Grischun sa sviluppada cuntinuadamain. En in tact da trais fin sis onns èn vegnids fundads dapertut en il chantun novs chors.
RR actualitad 08:00