Siglir tar il cuntegn
cuntegn

Chantun I va puspè ensi – Repower turna en zona da gudogn

Il quint 2017 mussa in gudogn da 21 milliuns francs. Avant in onn aveva la Repower anc stuì nudar ina perdita da 13 milliuns. Tuttina vul il concern desister da pajar ina dividenda. Quai scriva el en ina communicaziun a las medias.

Il quint 2017 mussa in gudogn da 21 milliuns francs – avant in onn aveva la Repower anc stuì nudar ina perdita da 13 milliuns. La svieuta dal concern è creschida da 1,7 sin passa 1,8 milliardas francs.

Damai che la Repower vesa vinavant ina situaziun da la rendita difficila e per rinforzar l'interpresa vul il cussegl d'administraziun proponer a la radunanza generala dal matg a Landquart da desister d'ina dividenda per l'onn da fatschenta 2017.

Legenda:
Repower cifras da 2012 fin 2017: Las cifras èn da leger en milliuns francs svizzers. Repower

Monika Krüsi duai succeder a Vincenz

Entant han ils quatter acziunaris principals – il chantun Grischun , l'Axpo Holding, l'Ovra electrica dal chantun Turitg e l'UBS Clean Energy Infrastructure Switzerland – chattà ina successura per Pierin Vincenz. Els proponan d'eleger tar ils candidats gia nominads a Monika Krüsi tant sco nova commembra en il cussegl d'administraziun sco er gist sco presidenta da quel.

Actualmain è Pierin Vincenz a la testa da la Repower

Ils 16 da matg vegn dentant ad occupar anc in'autra dumonda ils acziunaris da la Repower – numnadamain ina persunalia. Per quel di ha annunzià l'actual president dal cussegl administrativ da la Repower, Pierin Vincenz, sia demissiun da quel uffizi.

Monika Krüsi

Monika Krüsi

Presidenta dal cussegl d'administraziun da la Repower

Personen-Box aufklappenPersonen-Box zuklappen

Monika Krüsi (*1962) ha studegià economia da manaschi a Turitg ed ha promovì en informatica d’economia tar il tema Business Process Reengineering. Ella è en differents cussegls d’administraziun – uschia tar la firma da cussegliaziun MKP Consulting SA, nua ch’ella è er partenaria.

En il decurs da tut ils scumbigls enturn Pierin Vincenz sco anteriur schef da la Raiffeisen aveva tschertgà il chantun Grischun sco acziunari principal da la Repower il discurs cun Vincenz. Il resultat da quel discurs saja stà, che Pierin Vincenz haja annunzià da sa retrair sco president dal cussegl d'administraziun da la Repower tar la proxima radunanza generala, uschia il president da la regenza grischuna Mario Cavigelli envers RTR.

Nagin pled tar Vincenz en la communicaziun da Repower

Monika Krüsi duai pia succeder a Pierin Vincenz, ma quai na scriva la Repower betg en sia communicaziun. Tar Pierin Vincenz, ch'è enfin ils 16 da matg l'actual president dal cussegl d'administraziun da la Repower, na chatt'ins sin tut las quasi quatter paginas da la communicaziun da la Repower tar l'onn da gestiun 2017 nagut.

Pierin Vincenz, l'anteriur directur da la Raiffeisen, sa chatta dapi pli ch'in mais en arrest d'inquisiziun a Turitg. Ad el vegn renfatschà d'avair profità persunalmain tar affars uffizials da la banca Raiffeisen.

Per Pierin Vincenz vala la presumziun d'innocenza.

RR novitads 07:30+