Siglir tar il cuntegn

Chantun «I mancan simplamain ils giuvens»

Diversas musicas dal vitg han adina pli paucs commembers. Els din, ch'ils giuvens mancan simplamain. Quai n'è dentant betg dapertut uschia. En l'Engiadina datti schizunt ina nova musica da giuvenils.

Mattas che sunnan clarinetta.
Legenda: «Boom da clarinettas»: Instruments da lain sajan en il trend. Keystone
  • Diversas musicas n'han nagina glieud giuvna.
  • Ils paucs giuvens sunan surtut instruments da lain: clarinetta, flauta u saxofon.
  • Surtut giuvens cun instruments bass, pia la tuba, èn rars.

Tar mintga musica guarda quai ora puspè in pau auter. Ils ins han bunamain dapli giuvens che vegls. En auters lieus han ils pli giuvens prest gia 40 onns. In exempel en la Val Müstair: La musica Concordia Müstair ha il mument anc divers giuvens en lur lingias. En insaquants onns vegn quai a guardar ora auter, uschia l'actuara Sylke Hauser: «Quels van a far in giarsunadi, lura èn els davent, e nagin vegn suenter».

Auter a Domat. La Brass Band da giuvenils Imboden (JBBI) ha propi avunda glieud. Mintg'onn cumenza puspè ina nova gruppa d'uffants a sunar in instrument. «Cun lavurar stretg ensemen cun la scola da musica, pon ins fascinar ils uffants da restar tar la musica», di il president da la JBBI Adrian Willi. Era il dirigent sez è magister da musica. Quai è segir era in motiv per ils blers musicants.

Sumegliant a Zernez. Là datti dapi dus onns schizunt ina nova musica da giuvenils.

Lain è «in» – bass è «out»

Tenor las differentas uniuns, sajan surtut instruments da lain en moda: Clarinettas, saxofon, flautas traversas. Tar las musicas cumenzan surtut mattas a sunar. E quels instruments sajan pli populars tranter las mattas. Cornets e trumbettas haja quai però era avunda.

Tut las musicas èn d'accord: i mancan ils bass, las tubas. Tenor Toni Deplazas, president da la Brass Band da Giuvenils Grischuna e sez era tubist, n'èn ils instruments simplamain betg «hip». Las musicas emprovan però da persvader in u l'auter uffant da midar l'instrument. «Mintgatant ston ins sfurzar ils uffants a lur fortuna», di il president da la Brass Band da Giuvenils Imboden Adrian Willi cun in surrir.

RR Actualitad 07:00