Ils represchentants da la Confederaziun cun a la testa Isabelle Chassot, la directura da l’Uffizi federal da cultura, èn s’inscuntrads il prim da zercladur cun ina delegaziun grischuna cun Cusseglier guvernativ e parsura dal Departament d’educaziun, cultura e protecziun da l’ambient, Martin Jäger a la testa. Sut l’egida dal president da la Lia Rumantscha Johannes Flury han els discutà sur da la situaziun actuala da la gasetta «La Quotidiana». Tuttas partidas èn dal avis, che ord vista da la promoziun linguistica, dovria medias rumantscha fermas e da buna qualitad, scriva la Lia Rumantscha.
Garantir la purschida mediala actuala
En in emprim pass vali da garantir la purschida mediala en il sectur da print. A media vista saja necessari da prender en mira pussaivladads da svilup da tut las medias rumantschas, saja quai medias da stampa u digitalas. D’ina vart saja da reglar co furnir cuntegns medials rumantschs e da l’autra vart saja da coordinar la purschida optimala per pudair rinforzar la spierta mediala rumantscha en general, scriva la Lia Rumantscha. Ils discurs duajan cuntinuar anc avant l’atun.
RR novitads 10:00