Siglir tar il cuntegn
Inhalt

Chantun HTW resta a Cuira

Cuira è il sulet lieu che vegn en dumonda per la Scola auta da tecnica ed economia HTW. Quai ha il cusseglier guvernativ Martin Jäger confermà en l’ura da dumondas dal Cussegl grond.

Il bajetg da la HTW a la Ringstrasse cun bandieras dasperas.
Legenda: La HTW resta a Cuira. Keystone

Suenter ch’i aveva dà discussiuns sch’er Landquart pudess esser in’opziun sco lieu per la scol’auta, ha il deputà e president da la citad da Cuira Urs Marti dumandà suenter tar la regenza. Tenor Martin Jäger stettia quella en corpore davos questa decisiun.

Marti betg anc dal tut cuntent

Urs Marti ha anc fatg in'ulteriura dumonda. El ha vulì savair da la regenza sch'igl è planisà d'engaschar in manader da project sur ils departaments ora. Da quai na vuleva Martin Jäger dentant savair nagut. Sco adina en da quels cas vegnia collavurà tranter ils departaments.

Cura ch'i va lura per il bajetg sco tal surprenda il departament da bajegiar la batgetta. Quai sistem saja sa cumprovà. Tenor Urs Marti fissi pli simpel sche be in post cun in manader da project avess il lead, quai er per favurisar la collavuraziun cun la citad. Dal tut cuntent na saja el perquai betg, pir cura ch'il bajetg stettia ed el possia ir tras las stanzas saja el propi cuntent.

RR novitads 11:00