Siglir tar il cuntegn

Header

cuntegn

Chantun Hazel Brugger: «Rumantsch è per mai umor pur!»

Ella saja in talent curius, ella haja ina lieunga gizza, dentant er in grond cor - quai scrivan critichers da Hazel Brugger. La lieunga gizza e ses cor mussa ella era cun discurrer dals Rumantschs. RTR ha inscuntrà la comicra al festival d'umor ad Arosa.

Hazel Brugger

Avrir la box Serrar la box

La carriera da Hazel Brugger ha cumenzà cun il poetry slam. Or dal poetry slam è daventà in program da comedia. Quest onn ha la giuvna turitgaisa publitgà ses emprim cudesch. Era sur cunfins è Hazel Brugger enconuschenta. Per exempel è ella adina puspè en acziun sco reportra per la heute-show da ZDF.

RTR: Hallo, Hazel Brugger.

Hazel Brugger: Hallo.

Per rumantsch fiss quai «Allegra».

Quai sa jau perfin. Allegra (ria).

Tge As vegn endament cun pensar vi da la Rumantschia?

Vacanzas... Sch'jau pens vi da la Rumantschia, sche lura ma vegnan endament mias vacanzas sco uffant a Laus en la vischnanca da Sumvitg.

Ed jau sai anc precis che nus tadlavan il Radio Rumantsch e che nus chattavan quai fitg interessant e legher, perquai che nus ans dumandavan adina tge curiusas caneras che vegnan or dal Radio. Gie, quai vegn endament a mai, sche jau pens vi da la Rumantschia.

Enconuschais Vus rumantschs?

Gie, jau enconusch in ni l’auter. Pli baud er jau tar ina mamma dal di. L’um dad ella era da Mustér e discurriva rumantsch. Perquai m'è il tun da la lingua en l’ureglia.

Co ticcan ils Rumantschs en Vos egls?

Rumantschs vai jau adina resentì sco fitg amiaivels e cun buna luna. Grischuns en general èn uschè sportivs, fits e cuntents, quai vegn ad esser causa che Vus giais uschè bler a l’aria frestga (ria).

Effectiv vai jau propi in purtret fitg positiv da las Rumantschas ed ils Rumantschs. E quai na ditg jau uss be perquai che Vus essas er ina Rumantscha. E jau fiss pluffra, sche jau schess ad in Radio Rumantsch, ch'jau odiesch ils Rumantschs. Ma propi, fitg positiv.

audio
In discurs cun Hazel Brugger sur da rumanstchs per rumanstchs
ord Actualitad dals 18.12.2016.
laschar ir. Durada: 2 minutas 54 Secundas.
Rumantschs rian uschè ch'ins na chapescha betg! En sasez enconusch jau mo rumantschs cun umor. Ma quai stoss jau uss era dir sche jau discur cun ina rumantscha. U betg?
Autur: Hazel Brugger comicra

Discurrissas Vus gugent rumantsch?

Gea – savair savess jau gugent discurrer rumantsch, dentant na fiss jau betg pronta dad investir tant en uschè ina pitschna lingua. Lura investiss jau quel temp plitost per meglierar mes spagnol. Er sche quai fa uss forsa in pau mal a Vus ...

Però savais Vus tuttina dir in ni l’auter pled per rumantsch?

Ähhmmm, gea: Allegra (ria). Tge pos anc mussar a mai?

La Punt Chamues-ch...

La Punt Chamues-ch!

S-chanf...

S-chanf! Jau na chat quai ni grev ni cumplitgà. Tenor mai stos simplamain discurrer uschè che ti has l’impressiun da dir in «T» memia bler e lura è quai gist.

Lura faschainsa insatge pli cumplitgà: Tschintg-milli-tschintg-tschient-tschuncanta-tschintg tschancs tschuffs.

Insatge cun tschintg milli tschintg.... hmm, quai vul bain dir 5555 junkies, che stattan enturn la staziun da Cuira?

Han Rumantschs umor?

Tut quels, ch'jau enconusch, han umor. Dentant in pèr ch'jau enconusch, plitost glieud pli veglia, èn plitost catolics e lura èsi per part in zic grev cun mes umor extrovertì. Dentant tut en tut han ils Rumantschs - crai jau - schon umor. Dimena, taidla ina giada quella lingua, quai é jo umor pur!

Rian rumantschs auter?

Gea, jau manegel uschè ch'ins na chapescha betg.

Artitgels legids il pli savens