Siglir tar il cuntegn
Inhalt

Chantun GVG cun perdita operativa da 5 milliuns francs

L'assicuranza d'edifizis dal Grischun GVG ha fatg l'onn passà in gudogn da 26,2 milliuns francs, quai cunzunt grazia in bun onn a la bursa. Sin plaun operativ ha la GVG dentant fatg ina perdita da 4,9 milliuns francs.

Il president da la GVG Hans Geisseler ed il directur Markus Feltscher preschentan las cifras.
Legenda: Il president da la GVG Hans Geisseler ed il directur Markus Feltscher preschentan las cifras. RTR, Prisca Bundi

L’assicuranza d’edifizis dal Grischun GVG preschenta in bun resultat malgrà l’incendi grond ad Arosa. Il quint annual serra cun in plus da 26,2 milliuns francs, quai cunzunt grazia ad in bun onn a la bursa.

Sin plaun operativ ha la GVG dentant fatg ina perdita da 4,9 milliuns francs, quai er pervi dal donn stimà da 15 milliuns tar l’incendi dal Posthotel ad Arosa. En tut ha quai dà 939 cas da donns che han chaschunà ina summa da donns da bunamein 24,8 milliuns francs.

L'incendi dal Posthotel ad Arosa

Il donn dal Posthotel saja fin ussa dentant be in donn stimà, quai ha confermà Markus Feltscher il directur da la GVG. Il mument n'haja la GVG er betg anc pajà ora quella summa. Las investigaziuns na sajan numnadamain anc betg serradas. La raschun per l'incendi na saja anc betg enconuschenta, quai ha confermà era la procura publica.

Tgi paja cura?

Sut il stritg dependia quai uss er tge che las investigaziuns mussian, uschia Markus Feltscher. Sch'i vegnia ora ch'il possessur da l'hotel haja dà fieu na stoppian els pajar nagut, er sch'insatgi auter haja dà fieu stoppian els zuar pajar, possian dentant prender regress. Sche las investigaziuns mussian dentant ch'i saja stà in accident lu stoppia la GVG pajar. Per cas uschè gronds sco Arosa hajan els dentant ina reassicuranza che surprendia la mesadad dals custs, uschia che la GVG stoppia pajar be 7,5 milliuns francs.

RR actualitad 17:00