En tut survegnan las 70 vischnancas ord la gulivaziun da resursas 27,6 milliuns francs. Da la gulivaziun geografic-topograficas e da scola survegnan 56 vischnancas totalmain 24 milliuns francs dal chantun, scriva la regenza grischuna.
La gulivaziun da finanzas per las vischnancas ha sco finamira da rinforzar l’independenza finanziala da las vischnancas. Sco il chantun scriva sajan las differenzas tranter las vischnancas enorm grondas quai areguard la vart da las entradas ma er da la vart da las grevezzas.
42 vischnancas finanzialmain fermas
En tut èn 42 vischnancas finanzialmain fermas. Uschia han questas vischnancas entradas surproporziunalmain auas per persuna. Las vischnancas ston uss dar giu 16% da las entradas che surpassan la media da tut las vischnancas. La media actuala d’entradas munta a 3’631 francs per persuna. Las tschintg vischnancas che han da pajar il bler èn Farera, San Murezzan, Schlarigna, Runtgaglia e Sufers. Las tschintg vischnancas che survegnan il bler èn Furna, Flearda, Maton, Lon e Nufenen.
Gulivaziun da grevezzas geografic-topografic e da scola
L’onn 2017 vegnan en tut 56 vischnancas a profitar da la gulivaziun da grevezzas. Il chantun metta a disposiziun 24 milliuns francs. Decisiva è la lunghezza d las vias, la surfatscha da la vischnanca, la structura dal abitadi ed il dumber da scolaras e scolars en proporziun cun ils total d’abitants. Las vischnancas che profiteschan qua il pli bler èn Furna, Nufenen, Valragn, Val Stussavgia e Maton.
Midadas envers la calculaziun dal 2016
Per las singulas vischnancas ha per part pliras midadas pli grondas envers il 2016. Per questas vischnancas èn sa midadas las basas da calculaziun, uschia che la gulivaziun da finanzas resguarda questa dinamica, scriva la chanzlia chantunala Grischuna.
RR novitads 10:00