«Grischun vala dapli» - la campagna continuescha

Bun 20% dapli pernottaziuns ha Grischun Vacanzas cudeschà questa stad sur l'atgna plattafurma. Quai grazia a la campagna «Graubünden ist mehr wert». Ina campagna naschida la primavaira en consequenza dal ferm franc svizzer che vegn sco quai ch’i para appreziada da tuttas destinaziuns grischunas.

La campagna «Grischun vala dapli» ha cumenzà gia l’entschatta da questa stad.

Legenda da maletgs: Cun offertas spezialas cun dapli valur vul Grischun Vacanzas carmalar dapli giasts svizzers en il Grischun. graubuenden.ch

Duas notgs ad Arosa per mo 110 francs e quai inclusiv scola da skis. Ubain - per quels che san schon ir cun skis - forsa tuttina pli gugent insanua en l'Engiadina Auta per 220 francs. Sper 2 notgs ed ensolver en in hotel, datti cun quest'offerta era la carta da skis per mez pretsch ed il tren e bus èn era gratuits.

Questas ed anc bleras autras offertas da tut las regiuns grischunas chattan ins tar Grischun Vacanzas che cuntinuescha cun sia campagna «Graubünden ist mehr wert». Ina campagna cun purschidas spezialas che porschan sper las pernottaziuns era servetschs supplementars – pia er ina plivalur.

Resun positiv da las regiuns

La campagna ha gia cumenzà avant la stagiun da stad, ed ha gì fin ussa in effect positiv sin la fiera da stad. Grazia a la campagna drizzada ora sin la fiera Svizra, hajan ins pudì cudeschar 20% dapli pernottaziuns questa stad sur l’atgna plattafurma, di Myriam Keller, la scheffa ad interim da Grischun Vacanzas.

Il resun da las singulas destinaziuns saja en mintga cas bun, sch’i giaja per giuditgar la campagna da plivalur. Las destinaziuns apprezieschian zunt fitg che tut las destinaziuns fetschian ina giada tuttas ensemen ina campagna e che tuttas sa participeschian als custs.

«  Igl è ussa conscient a tuts che quai è la suletta via gista en questa situaziun dal martgà il mument. Ch’ins fa quai ensemen e ch’ins sa preschenta era sco unitad al martgà. »

Myriam Keller
Scheffa ad interim da Grischun Vacanzas

Malgrà campagna puspè in minus

1,1 milliuns francs han chantun e las destinaziuns investì en questa campagna per carmalar ils giasts svizzers en il Grischun. Ina campagna ch'i haja duvrà, sch'ins guardia sin las cifras da pernottaziun. Almain haja la campagna pudì dar in impuls posititv.

«Il dumber da pernottaziuns dals giasts svizzers è pli u main restà tuttina la stad, fertant ch’igl ha dà tar questas dals giasts da la Germania per exempel puspè in minus», di Myriam Keller. Il Grischun stoppia far quint cun in ulteriur minus questa stad, probabel da 7 enfin 8%.

Betg cler sch’i vegn cuntinuà

La campagna d’enviern ha gia cumenzà cun offertas spezialas cun dapli valur. Grischun Vacanzas spera che questas hajan vinavant in effect positiv sin las pernottaziuns en il Grischun.

Sche questa collavuraziun tranter tut las destinaziuns grischunas vegn era a cuntinuar suenter la stagiun d’enviern - pia sch’i vegn era a dar vinavant ina plattafurma cun offertas spezialas cun ina plivalur da tuttas destinaziuns grischunas- quai vegnia decidì pir las proximas emnas, uschia Myriam Keller. Il mument sajan ins anc en tractativas.

RR actualitad bunura 06:00