Chantun - Grischun Vacanzas n'elegia naginA presidentA

Sco l’organisaziun da marketing Grischun Vacanzas ha communitgà, n'ha la radunanza generala da mardi anc betg pudì eleger in nov president u ina nova presidenta. Raschun per quai saja che la persuna proponida unanimamain da la suprastanza na possia betg anc vegnir numnada cun resguard sin sia situaziun professiunala actuala. Per quest motiv ha Grischun Vacanzas spustà l’elecziun sin ils 14 da zercladur. Enfin là resta Marcel Friberg president.

Avant la radunanza generala avevan las medias speculà che Ariane Ehrat savess surpigliar il presidi. Ella piglia quels dis suenter 9 onns cumià da ses uffizi sco directura da la destinaziun Engiadina San Murezzan.

Maletg 1 / 6

Legenda: Marcel Friberg da Breil ha manà Grischun Vacanzas ils ultims onns. ANR

Maletg 2 / 6

Legenda: Andreas Wieland ha timunà Grischun Vacanzas ils onns 2006 fin 2012. SO

Maletg 3 / 6

Legenda: L'anteriur cusseglier dals chantuns Christoffel Brändli è stà a partir dal 1998 fin il 2006 president da Grischun Vacanzas. Keystone

Maletg 4 / 6

Legenda: Luregn Matthias Cavelty ha presidia Grischun Vacanzas tranter ils onns 1987 fin 1998. RTR

Maletg 5 / 6

Legenda: L'anteriur cusseglier federal Leon Schlumpf (dretg) ha presidia Grischun Vacanzas durant quatter onns. Keystone

Maletg 6 / 6

Legenda: Ettore Tenchio era passa 10 onns al timun da Grischun Vacanzas, qua a chaschun da las festivitads d'RTR. RTR

Bun onn da gestiun

Grischun Vacanzas ha fatg in gudogn da 92’000 francs e reservas da 610’000 francs e po guardar enavos sin in onn da success. Las reservas èn prevesidas per la realisaziun da la nova strategia 2017-2020. Betg mo a reguard las finanzas èsi stà in bun onn per l’organisaziun, a la fin da l’onn han era las ultimas plazzas da lavur en connex cun la reorganisaziun savì vegnir occupadas. Da numnar è qua surtut Martin Vincenz sco CEO.

RR novitads 17:00