Grischun vacanzas, ina crisa gia dapi onns

Per il turissem grischun vesi or nair tenor las ultimas prognosas dal KOF. Dad ina crisa en il turissem discurran ils turistichers dentant gia dapi onns. In sguard en l’archiv mussa, ch'i ha dà ils davos diesch onns differents problems e crisas ch'il turissem ha gì da surmuntar.

Logo da Grischun vacanzas.

Legenda da maletgs: Grischun vacanzas cun la campagna «The Heimat Feeling» il 2002. Keystone

L’institut da perscrutaziun da la conjunctura da l‘ETH a Turitg (KOF) quinta per l’onn 2015 cun in minus da pernottaziuns da 3,4 pertschient. Gia l’onn avant aveva quai dà in minus da 1,3 pertschient, il 2013 in lev plus ed ils 2012 schizunt in minus da 7,1 pertschient.

Crisa gia dapi onns

Dad ina crisa en il turissem discurran ils turistichers dentant gia dapi onns. In sguard en l’archiv da RTR mussa, ch'i ha dà ils davos diesch onns differents problems e crisas ch'il turissem ha gì da surmuntar. L’onn 2001 per exempel crititgavan turistichers che la politica dettia memia pauc sustegn al turissem. Turissem na dastgia betg pli esser insatge che politichers fetschian «anc dasperas».

Igl è vegnì anc «mender»

Er l’onn 2007 hai dà ina «crisa». La digren dals giasts aveva entschet e davent dal 2008 ha il Grischun adina pers dapli giast. Il 2011 discurriva Gieri Spescha, anteriur responsabel per las medias da Grischun vacanzas, dad ina «situaziun dramatica». Il funs da la Val saja arrivà.

Igl è lura dentant anc vegnì «mender». L'iniziativa da secundas abitaziuns, il «na» tar gieus olimpics en il Grischun ed il «na» tar ina lescha chantunala davart las taxas turisticas han vinavant dà da magunar ad inqual turisticher. Il pli nov schoc è capità quest onn cun l'aboliziun dal curs minimal da l’euro.