Siglir tar il cuntegn

Header

cuntegn

Chantun Grischun mitscha cun in egl blau

Las prognosas per las malauras èn stadas pli u main accuratas. Bain hai dà numerus donns pitschens vi da bajetgs, terren agricul e guauds. Tuttina è il Grischun mitschà cun il egl blau – er grazia a la preparaziun da vischnancas e chantun.

La ferma plievgia è tschessada il venderdi a bun’ura. Las pli grondas quantitads d’aua èn vegnidas mesiradas en il Valragn. Là ha ina staziun da mesiraziun registrà 166,7 mm aua aifer las ultimas 48 uras, scriva l’Uffizi chantunal per privels da la natira.

audio
Mezdi: Situaziun da mezdi en il GR suenter malauras
ord Actualitad dals 17.06.2016.
laschar ir. Durada: 2 minutas 4 Secundas.

Fin 120 liters aua per meter quadrat

Tranter la Surselva, sur la Val S. Pieder fin la Val Stussavgia sco er en il Mesauc e la Bregaglia hai dà tranter 80 e 110 mm aua, localmain er 120 mm.

En las ulteriuras regiuns dal chantun ha quai pluvì tranter 50 ed 80 mm. Las prognosas èn uschia stadas pli u main accuratas. Be en il Partenz ed en la Bregaglia hai dà dapli plievgia che spetgà.

La gallaria tranter Platta e Curaglia en Val Medel.
Legenda: La gallaria tranter Platta e Curaglia en Val Medel. RTR, H. Giger

Pitschens, ma numerus donns

La blera plievgia ha procurà per fitg auts nivels d’auals e flums. Il Rain davent da Domat saja be mintga 10 fin 30 onns uschè aut, uschia l’uffizi. Sbuvaditschs, bovas e grondas massas aua èn stadas d’observar en blers lieus.

Malgrà la situaziun hai dà relativamain pitschens, ma numerus donns, cunzunt vi da bajetgs, terren agricul e guauds.

Prognosa: damain plievgia

Per ils proxims dis vegn vinavant quintà cun urizis e plievgia tranter 10 fin 25 mm. Dumengia e glindesdi datti in zic dapli plievgia (30 mm). Il cunfin da naiv va puspè ad aut sin 2’300 fin 2’700 meters sur mar. Cunquai ch’ils terrens èn fitg saturads datti vinavant in privel da sbuvaditschs e bovas.

RR novitads 14:00

Artitgels legids il pli savens