Siglir tar il cuntegn

Header

audio
La regenza grischuna è trumpada
Or da Actualitad dals 14.02.2020. Maletg: Keystone
laschar ir. Durada: 53 Secundas.
cuntegn

Grischun è trumpà Caduff: «Confederaziun protegia in monopol per in'uniun privata»

Ils ultims onns ha il chantun investì en in project per evaluar, sch'il chaun anatol è adattà per proteger muntaneras da nursas dal luf. La Confederaziun ha ussa decidì e ditg na a la dumonda dal Grischun.

Malgrà resultats positivs dal project d'evaluaziun dal chantun Grischun, ha l'Uffizi federal per l'ambient refusà la dumonda da renconuscher ils chauns anatols sco chauns da protecziun. Quai munta che tals chauns na vegnan betg sustegnids finanzialmain da Berna.

Chantun Grischun è trumpà

«En emprima lingia essan nus trumpads», di il cusseglier guvernativ Marcus Caduff. Quai confermia però quai ch'ins supponia gia daditg. Apparentamain na veglia la Confederaziun betg sustegnair dapli razzas da chauns per proteger muntaneras.

Chaun da protecziun dil raz Anatolier.
Legenda: Chaun da protecziun dil raz Anatolier. MAD

Proteger monopol existent

La Confederaziun n'haja betg interess da sustegnair ulteriuras razzas da chauns, di Marcus Caduff e renfatscha a la Confederaziun da proteger il monopol surdà ad in'uniun privata. Quai ha il chantun crititgà gia avant mez onn.

Betg resguardà ils resultads dal studi Grischun

La Confederaziun pretenda en lur argumentaziun ch’ils chauns da protecziun anatols s’absentian memia lunsch da lur muntanera, ch’els sajan privlus per auters chauns e ch’els pericliteschian ils dus ulteriurs raz gia renconuschids da la Confederaziun.

Il studi fatg en il Grischun vegn tiers la conclusiun che tut ils chauns da protecziun anatols che han fatg part al project, adempleschan las pretensiuns che la Confederaziun fa per chauns da protecziun. Tenor ils responsabels dal chantun Grischun n'ha l’Uffizi federal per l’ambient betg resguardà ils resultats or dal studi Grischun. Enstagl argumentescha l'uffizi federal cun text ord la litteratura e cun experientschas da purs da la Frantscha.

audio
GR vul, Berna betg, chauns da protecziun anatols – in discurs
ord Actualitad dals 14.02.2020.
laschar ir. Durada: 6 minutas 38 Secundas.

Ord l'archiv

Dapi radund 20 onns è il luf enavos en il chantun Grischun, e dapi lura s'occupan ins era cun la protecziun da muntaneras. L'emprim chaun da protecziun aveva anc mors a las nursas en las ureglias. Oz han er ils chauns emprendì da far la differenza tranter lufs e viandants.

audio
Da lufs, nursas ed uffizis – la protecziun da muntaneras
ord Marella dals 26.01.2020. Maletg: Keystone
laschar ir. Durada: 37 minutas 54 Secundas.

RTR actualitad, 06:00

Artitgels legids il pli savens