Siglir tar il cuntegn

Header

cuntegn

Grischun e la refurma fiscala Refurmar cun sbassar la taglia u betg – la cumissiun è dividida

Er il Grischun ha da realisar la refurma fiscala da la Confederaziun. En dus emnas tracta il Cussegl grond en chaussa. Uss ha preschentà la cumissiun predeliberanta sia posiziun en chaussa – u meglier ditg sias posiziuns, pervi che la cumissiun n'è betg vegnida da perina co che questa refurma fiscala duai vegnir prendida per mauns.

La maioritad da la cumissiun saja stada per sbassar la taglia sin il gudogn per persunas giuridicas dad oz 5,5 pertschient sin 4 pertschient, scriva la cumissiun per economia e taxas en sia communicaziun a las medias.

Ina minoritad vuleva sbassar pli pauc questa taglia – ed ina segunda minoritad na vuleva insumma nagina sbassament. La maioritad segua uschia a la proposta da la regenza grischuna.

Il Grischun e la refurma fiscala federala

Avrir la box Serrar la box

La lescha federala davart la refurma da taglia ch'è vegnida acceptada il matg a l'urna duai en emprima lingia vegnir realisada cun sbassar la taglia per interpresas.

La regenza grischuna vul sbassar quella tariffa da 5,5 sin 4%. En pli duai vegnir introducì ina boxa da patentas sco er deducziuns supplementaras da la taglia per expensas da perscrutaziun e svilup.

Per persunas privatas na mida la nova lescha betg bler. Sulettamain la pauschala per custs da professiun vegn auzada da 3'000 sin 3'500 francs.

Per chantun e vischnancas munta questa midada ina perdita dad entradas tar las persunas giuridicas. Quella perdita po per part vegnir egualisada cun la pli auta cumpart da la taglia federala che chantun e vischnancas survegnan. Quintà vegn la finala anc cun ina sperdita da mintgamai radund 10 milliuns francs per chantun e vischnancas.

RR novitads 11:00+

Artitgels legids il pli savens