La destinaziun Engiadina San Murezzan ha probabel pudì profitar dals Campiunadis mundials da skis. En total ha questa destinaziun dumbrà il favrer 229'714 pernottaziuns (2016: 215'273). Er il sguard sin la statistica da derivanza dals giasts mussa ch'il campiunadi da skis ha carmalà. Il dumber d'Austriacs è s'augmentà per 135,9% sin 10'154 persunas, cumpareglià cun il favrer 2016. Ma er ils dumbers da giasts dals Stadis Unids, da la Pologna, da la Russia u da la Tschechia èn s'augmentads marcantamain.
Al campiunadi 2003 anc dapli pernottaziuns
L'onn 2003 ha San Murezzan er già organisà il campiunadi mundial. Lura ha la destinaziun nudà 276'908 pernottaziuns, pia anc 47'194 pernottaziuns dapli ch'il 2017. L'ambient economic e las structuras da la branscha èn sa midadas durant quests ultims 14 onns. Il campiunadi ha cuvert mo ina part da las pernottaziuns dal favrer (2003: 2. - 16.2; 2017: 6. - 19.2).
Cumparegliaziun pernottaziuns a San Murezzan (campiunadi)
favrer | manaschis | letgs | pernottaziuns |
2003 | 173 | 13 325 | 276 904 |
2017 | 143 | 14 215 | 229 714 |
Il 2003 era l'emprima cursa ina dumengia. L'occurenza è lura s'extendida sur trais fins da l'emna. Er quai pudess declerar la differenza, di Patrick Casanova, manader statistica da l'Uffizi per economia e turissem dal Grischun.
Svizra ha damain pernottaziuns
Suenter las cifras positivas dal schaner ha la hotellaria svizra dumbrà il favrer 1,5% damain pernottaziuns, en total anc 3'040'239. Dal schaner fin il favrer ha la hotellaria svizra registrà en total 5,7 milliuns pernottaziuns, quai è in plus da 1.6% u 88'000 pernottaziuns dapli che l'onn 2016. 2,8 milliuns pernottaziuns van sin il conto da giasts da l'exteriur.
RR novitads 10:00