Thomas Roffler, il president da l'uniun purila dal Grischun, vesa cunzunt ina raschun per quella correctura abrupta dal pretsch per charn da pors: l'aura.
Nus avain gì ina stad bletscha e fraida. Quai vul dir ch’i n’ha betg fatg aura da grillar. La charn-portg è anc adina ina charn ch’è fitg dependenta da la stagiun da grillar.
Mo l'onn passà eran ils precis anc pli bass. Da quai temps survegniva in elevatur anc 3,70 francs per kilo. 20 raps pli pauc ch'uss. Quai saja uschia, conferma Roffler. Ins haja dentant reagì e reducì il dumber da portgs sin fiera. Quai haja gì in effect positiv sin il pretsch. Mo sche la luna dals consuments sa mida puspè lura sentan ins quai immediat ed ì dettia puspè da memia charn sin fiera. E quai haja lura puspè smatgà il pretsch.
Nagins quitads per il Grischun
Gronds quitads na fa quella situaziun dentant betg al president dals purs grischuns. Betg ch'el n’avessi betg chapientscha per la situaziun difficila dals elevaturs da portgs. La raschun è in'autra. «Il Grischun n’è mai stà in chantun cun blers portgs. Nus avain adina gì blers arments.» Quai conferman era las cifras da l’uffizi chantunal d'agricultura. L'onn passà han els dumbrà 5'900 portgs el Grischun. Pauc cumpareglià cun las bun 50'000 nursas ed ils 73'000 arments.
Bler portgs anc ad alp
Ultra da quai passentian blers portgs la stad si d'alp, di Roffler. Là vegnian els bavrads cun la scotga da la producziun da chaschiel d'alp e valian uschia sco spezialitad. «Quels portgs èn pli pauc sut squitsch perquai che quai è in product stagiunal cun ina derivanza ed identificaziun clara. Il sigil da qualitad ‘alp’ vegn anc adina stimà aut dals consuments.»
Pajar pretschs gist per ils products
Swissporcs, l'uniun svizra dals elevaturs da portgs, appellescha entant als cumpraders, en spezial Coop e Migros, da pajar pretschs gists e fairs. Sch'ils elevaturs na possian betg curclar lur custs alura n’investeschian quels era betg. E quai pericliteschi a media vista la producziun da charn da portgs en Svizra.
RR actualitad 08:00