Siglir tar il cuntegn
cuntegn

Chantun Grischun avess potenzial per fin 150 hotels novs

Nizzegiar meglier l’infrastructura existenta cun sinergias. Quai ina strategia che savess tenor il forum d’economia grischun augmentar l’attractivitad dals lieus da turissem en il Grischun.

Legenda: Guardar il video Grischun ha anc potenzial per 100-150 hotels. Durada 02:51 minutas.
Or da Actualitad video dals 26.10.2015.

Tenor il rapport duai dar 60 lieus en il Grischun che èn adattads per talas sinergias. Sch’ins pudess realisar tut las sinergias, dess quai tranter 100 fin 150 hotels novs.

«Il giast vul far vacanzas en in hotel cun ina infrastructura attractiva», uschia Peder Plaz dal Forum d’economia grischun. Cunquai che betg mintga hotel pitschen possia porscher ina gronda infrastructura, saja impurtant ch’ils hotels possian nizzegiar sinergias cun infrastructura existenta.

Il giast vul far vacanzas en in hotel cun ina infrastructura attractiva.
Autur: Peder PlazForum d'economia grischun

«Sco infrastructura attractiva valan per exempel access per territoris da skis, centers da sport u era lais. Uschia è il giast cun be paucs pass dal hotel tar ses lieu giavischà. Lungs viadis cun il bus èn puac attractivs.»

Bogn Engiadina – in bun exempel per sinergia

A Scuol èn gist 4 hotels colliads tras passarellas cun il Bogn Engiadina. Uschia pon ils hotels porscher a lur giasts in’infrastructura, ch’els na pudessan uschiglio betg porscher. Il sistem ha success. Mintga terz giast dal bogn dorma numnadamain en in dals 4 hotels. Quest hotels sa participeschan vi dals custs dal bogn ed uschia profitescha era il bogn profitar. La participaziun dals hotels èn en congual cun in agen bogn fitg favuraivels, uschia il rapport.

60 lieus cun potenzial da sinergia

Lieus cun grond potenzial da sinergia datti tenor il rapport per exempel a Lai u er a Samignun. Là pudess ins nizzegiar sinergias tranter il bogn, il territori da skis e differents hotels. Per quai fissi dentant da midar las zonas da construcziun.

«Sch’ins cumenzass ussa a midar las zonas, fissan ils lieus en diesch onns pronts per investiturs.» uschia Peder Plaz dal Forum d’economia grischun. «Mo cun lieus attractivs da fabritgar hotels vegn ins era en futur da pudair attrair buns investiturs per la regiun.» Da midar las zonas saja ussa il pensum da las vischnancas, quai en l’interess per il turissem e per il futur dal lieu da turissem.

Blers studis – pauc capita

Studis e rapports da tutta sort cumparan bunamain mintga di. Bleras da las ideas ponderadas na vegnan dentant mai propi realisadas, quai conferma era Hans Peter Danuser, anteriur directur da cura da San Murezzan. I saja da sperar ch’i sa laschia realisar in u l’auter project dal rapport. Perquai stoppian las vischnancas ussa però daventar activas e chattar lieus adattads per investiders. Sche quai na capita betg, giaja era quest rapport baud ni tard en in truchet.

Finamira èn dus ni trais projects

Andreas Züllig, il president da Hotellerie Suisse ch’è sez hotelier a Lai, crai vi da l’idea ed il potenzial dal rapport. I na saja dentant betg uschè simpel da realisar tals projects. Numerusas difficultads sajan da surmuntar fin tar il project definitiv. In avantatg na saja er betg la situaziun actuala pauc attractiva per investiders, uschia Züllig. La finamira saja ch’i vegnia a dar ils proxims onns dus u trais projects tenor l’idea da la sinergia d’areal.