Ina part dals 50'000 edifizis en il Grischun ch'èn pli vegls che 25 onns vegn sanada energeticamain ils proxims onns. Cun quai quinta in studi ch'è vegnì fatg sin incumbensa da l'Uffizi d'energia e da traffic, l'Uffizi per economia e turissem e da la Josias Gasser materialias da construcziun SA.
Plazzas pudessan vegnir dublegiadas
Questas sanaziuns energeticas sajan colliadas cun investiziuns da passa 200 milliuns francs per onn, uschia il studi da Infras e Bakbasel. D'in terz da questas investiziuns (var 70 milliuns francs) dastgassan profitar las interpresas grischunas cun la planisaziun, la montascha e l'installaziun.
Tenor il studi mainan quellas investaziuns a 650 plazzas a temp cumplain. Plazzas che pudessan vegnir dublegiadas, sche pignas ed elements da construcziun vegnissan sanads consequentamain a la fin da lur durada da vita tecnica, concludan ils auturs dal studi.
Respargns da fin 8 milliuns francs ad onn
Il mument importa il Grischun ieli da stgaudar e gas en la valur da 130 milliuns francs. Grazia a las sanaziuns energeticas quinta il studi ch’ins pudess spargnar uschia fin a 2,6 milliuns francs (var 2%) ad onn tar l’import. Vegniss sanà consequentamain, lura quinta il studi cun respargns da schizunt 6% tar l’import dad ieli e gas, quai che fiss lura in respargn da prest 8 milliuns francs ad onn.
Il Grischun spargnassi uschia, vegnissi pli independent da l’ieli e gas e contribuissi a la protecziun dal clima.
RR novitads 11:00