Siglir tar il cuntegn

Header

Navigaziun

in um en chamischa verda ses en biro e fa quints cun in calculader
Legenda: Ina giada en sia vita po mintgin confessar senza survegnir in chasti, ch'el ha zuppà daners da la taglia. Keystone
cuntegn

Chantun Grischun: 290 persunas han zuppentà daners da la taglia

En il Grischun èn il 2016 bunamain dubel tantas persunas s'annunziadas tar las autoritads fiscalas perquai ch'ellas han defraudà taglia. Tenor ina retschertga da l'agentura da novitads svizra han 290 persunas fatg ina autodenunzia en il Grischun.

Las autodenunzias portan 7,2 milliuns francs a Confederaziun, chantun e vischnancas. Las persunas che han confessà na survegnan nagin chasti.

Era blers auters chantuns han registrà in record da persunas ch'èn s'annunziadas sezzas perquai ch'ellas han defraudà taglia. La raschun principala per las bleras autodenunzias pudess esser il barat d'infurmaziuns automatic.

Nov record er a Turitg

A Turitg hai dà in nov record d'autodenunzias a l'uffizi da taglia dal chantun. En total hai dà 2'110 novas denunzias, 600 dapli che l'onn passà. Tenor la direcziun da finanzas haja la discussiun publica davart daners betg declerads manà a quest augment considerabel. Cun las autodenunzias da l'onn passà a Turitg èn vegnidas a la glisch facultads da passa ina milliarda francs.

A Basilea Citad hai medemamain dà in nov record cun 381 autodenunzias che han purtà a la glisch en total 26,6 milliuns francs. En Basilea-Champagna han 797 persunas dà tiers d'avair zuppà daners.

Dapi il 2010 datti la pussaivladad da denunziar sasez senza survegnir in chasti. Quai dretg ha mintgin ina giada durant sia vita.

RR novitads 10:00