La grippa ed il dafraid èn omaduas malsognas malempernaivlas che fan grev noss mintgadi. «La grippa vegn dentant savens registrada sco pli stanclentusa», di Edith Oechslin ch'è media da chasa e vicepresidenta dals medis dal Grischun.
Las differenzas
Tar la grippa èsi uschia ch’ella vegn dad in di sin l’auter. Tar lezza na vulan ins betg pli sa mover ed il pli gugent restassan ins enta letg. Ins ha mal la testa, las giugadiras u era la musculatura. Ils effects èn savens uschè ferms ch’ins na po betg ir a lavurar. Ils sintoms dal dafraid sa mussan pli plaun. Quels èn malempernaivels dentant èsi pussaivel dad ir a lavurar. Il dafraid resta era mo per in pèr dis. Ils effects da la grippa percunter sentan ins anc las ulteriuras emnas.
Virus d’influenza
La grippa sa derasa tras il virus d’influenza. Quels vegnan centrifugads tras l’aria sch'insatgi starnida. Millis da quels sgolan lura tras l'aria e vegnan prendids si sur bucca, nas e schizunt ils egls. E sch’il virus è ina giada en il corp lura vali da restar enta letg e spetgar giu.
Edith Oechslin di ch’ins na sto betg currer grad tar il medi per medicaments. Ils medicaments na gidan betg da reducir ils dis mabain pon be reducir ils effects negativs da la grippa. Tgi ch’ha da basegn d'in attestat per la lavur sto tutta cas ir tar il medi e quai durant la grippa. Suenter la malsogna na survegnian ins betg pli in attestat, declera Edith Oechslin.
RR actualitad 06:00