Da dadora tradeschan be las duas cigognas decorativas che quai è ina chasa da parturir – ed er l'interiur guarda ora plitost sco ina bella abitaziun u forsa schizunt sco in chalet da vacanzas cun bler lain, glisch empernaivla, gea schizunt cun jacuzzi (ch'è natiralmain ina bognera da parturir). Per Graziella Montalta, la spendrera da 40 onns, ch'ha avert la chasa da parturir a Vaz Sut, èsi er impurtant che l'atmosfera saja bella.
Bleras dunnas sa sentan in zic stressadas dals cabels en ils ospitals ubain forsa era dal persunal che mida, perquai prefereschan ellas dad ir en ina chasa da parturir, nua ch'ellas enconuschan mai e sa sentan pli ruassaivlas – er il pop nascha para a mai pli ruassaivel.
Perquai èn lura era tut ils «apparats» ch'i dovra per in cas urgent zuppads en las stgaffas.
Premissas per parturir en ina chasa
Dentant betg mintga dunna po parturir en ina chasa da parturir, di Graziella Montalta che fa er controllas avant la naschientscha. «Tschertas premissas ston esser dadas, per exempel ston mamma e pop esser sauns ed il pop en la dretga posiziun». L'emprim pop ha er gia inaugurà la nova chasa da parturir - da Nadal, ils 25 da december, è naschì in buob.
RTR actualitad 07:00