Siglir tar il cuntegn
Inhalt

Chantun GR: Custs da sanadad èn sa dublegiads

Ils custs da sanadad en il Grischun èn sa dublegiads da l'onn 2000 fin l'onn 2014. Lura eran els tar 276 milliuns francs che chantun e vischnancas han purtà. Quai mussa il rapport davart il provediment da sanadad dal Grischun ch'è vegnì preschentà la gievgia a Cuira.

Legende: Video En il Grischun mancan ils medis en il sectur ambulant abspielen. Laufzeit 01:35 Minuten.
Or da Telesguard dals 08.06.2017.

In'excepziun è stà l'onn 2014: Lura èn ils custs sa sminuids en cumparegl cun l'onn avant per 14 milliuns francs da 290 sin 276 milliuns francs.

Quai na saja dentant nagin trend – il motiv saja, ch'investizuns charas n'èn betg vegnidas fatgas di il minister da sanadad dal Grischun Christian Rathgeb. En pli mussa il rapport quantas persunas che lavuran en il sectur da sanadad u er quants pazients ch'èn vegnids tgirads.

Model decentral duai restar

Sper quai ha Christian Rathgeb er sincerà, ch'il Chantun cumbattia per il sistem d'ospitals actual. Per il mument datti en l'entir Grischun 11 ospitals publics, quels èn sparpagliads en tut las valladas.

In sistem ch'è periclità perquai che la Confederaziun ponderescha d'introducir in minimum da cas che mintga ospital ha dad ademplir per dastgar exister. Quai na saja dentant betg pussaivel en ils ospitals pitschesn en il Grischun, uschia Christian Rathgeb.

Largias en il provediment da basa

In minimum da cas manass tar la situaziun, ch'ils ospitals en la periferia na pudessan betg pli exister e quai manass tar largias en il provediment da sanadad da basa. Perquai fetschia il Chantun tut per mussar a la Confederaziun, ch'il sistem actual funcziuna fitg bain e che la qualitad saja malgrà pli paucs cas tuttina fitg buna.

RR actualitad 17:20