Siglir tar il cuntegn

Chantun Giuvens debatteschan quasi sco ils «vegls»

En la sala dal Cussegl Grond vegn debattà e discussiunà venderdi e sonda. Dentant betg dals deputads ordinaris, mabain da giuvenils da 16 enfin 25 onns. Els fan part da la sessiun dals giuvenils grischuna ed elavuran petiziuns tar differents temas. Cun la finamira, da persvader il Cussegl Grond.

Politichers e politicras sco figuras da action - il sujet per il flyer che duai carmalar giuventetgna a la sessiun dals giuvenils grischuna.
Legenda: Invit a la sessiun dals giuvenils grischuna Cun politichers e politicras sco figuras da action è la giuventetgna grischuna vegnida envidada a la sessiun. RTR, S. Bundi

Il proceder dals giuvens è sumegliants a quel dals deputads «pli vegls». Els discussiuneschan en cumissiuns tematicas sur da problems actuals ed elavuran petiziuns che vegnan lura surdadas al Cussegl grond. La politica na saja gnanc uschè lungurusa sco quai ch'ins pensa, dian insaquants.

In grond giavisch dals giuvens e da las giuvnas è dentant, ch'els na fetschian betg lavur per il giat, mabain ch'ils deputads e las deputadas prendian serius lur pretensiuns e petiziuns.

Giuvens e frestgs

Forsa èn ils giuvens da la sessiun da giuventetgna pli curaschus e pli visiunaris, forsa main versads ubain rufinads ch'ils politichers che fan normalmain politica en la sala dal Cussegl Grond. Dentant, els sajan anc giuvens e frestgs ed hajan uschia er tut in'autra vista sin problems e chattian uschia forsa era in'autra schliaziun che usità.

Quai che pertucca ils temas da discussiun na sa differenzieschan ils giuvens betg bler dals deputads. Els han discussiunà davart energia, ambient, politica da linguatg ubain davart segirezza. Ils temas pli giuvenils han els dentant er tractà: Per exempel partizipaziun da giuvenils ubain sortida.