Siglir tar il cuntegn
Inhalt

Chantun «Gist il Grischun vess da sustegnair l'iniziativa AVSplus»

Quai di Gion Cotti ch'è president da l'Uniun grischuna dal persunal dal maun public. El è persvas che gist il Grischun dovria in augment da las rentas perquai ch'i dettia surproporziunalmain blera glieud che haja be la renta da l'AVS suenter la pensiun.

davantvart flyer per l'inizitiva AVSplus e davosvart commembers da l'allianza per l'iniziativa.
Legenda: L'allianza grischuna per l'iniziativa AVSplus ha preschentà ses arguments. RTR, Gion Gieri Flepp

L'augment previs da 10% saja finanziabel cun ils 0,8% che emploiads e patruns (mintgamai 0,4%) pajassan dapli a l'AVS mintga mais, uschia ils adherents da l'iniziativa. Latiers vegnian anc che la cumpart da la paja en favur da l'AVS creschia er en l'avegnir entras las pajas che creschian.

Tuttina conceda er Gion Cotti ch'i dovri in ulteriur sforz per segirar l'AVS a lunga vista. Quel vegnia fatgs cun la refurma da la prevenziun da vegliadetgna 2020 en il parlament.

La refuma prevesa in augment dad 1% da la taglia sin plivalur en favur da l'AVS.

Quels che dovran profiteschan

Cunter l'argument dals adversaris ch'ils pli basegnus na profitassian gnanc da l'iniziativa perquai che las prestaziuns supplementaras vegnissas stritgadas sa dosta Gion Cotti vehementamain. Ils politichers burgais veglian gia uss stritgar bleras prestaziuns supplementaras, uschia ch'ils basegnus avessan tar in na a l'iniziativa anc pli pauc.

Tar l'argument dals adversaris ch'er ils ritgs profiteschan da l'augment, manegia Gion Cotti ch'ins avess bain pudì definir in cunfin, lura fissen dentant er ils pajaments da glieud ritga en favur da l'AVS pli pitschens e Cotti ha agiuntà in citat da l'anteriur Cusseglier federal, Hans-Peter Tschudi:

Ils ritgs na dovran betg l'AVS dentant l'AVS dovra ils ritgs.
Autur: Hans-Peter Tschudianteriur Cusseglier federal

RR actualitad 12:00