Gieus olimpics: La resistenza sa furma

Strusch che la regenza ha publitgà il datum da votaziun davart ils gieus olimpics s'annunzia l'opposiziun. Il comité Grischun critic a gieus olimpics avertescha danovamain ch'il pievel da votaziun cumpra il gat en il satg. L'urari stretg na lascha betg tiers da preschentar custs precis.

purtret dals rintgs olimpics

Legenda da maletgs: Il pievel grischun ha danovamain da votar davart gieus olimpics en il chantun il 2026. Keystone

Dapi las candidaturas 2010, 2014 e 2022 averteschia il comité dals custs betg enconuschents. Cun 25 milliuns francs possian ins dar en lavur ina candidatura entaifer la Svizra e cun agid da la confederaziun. Ma nagin sappia quant ch'ils gieus custan sche la Svizra avessi da survegnir ils gieus entras l'IOC, uschia scriva il comité. El vegnia a cumbatter ils plans per ina candidatura grischuna per ils gieus olimpics d'enviern 2026.

Dumondas e dumondas

Er la partida socialdemocratica grischuna s'annunzia. Ella veglia gugent sa participar a la discussiun davart ils plans da gieus olimpics. I dettia ina pruna dumondas: Midadas da plan, reglas da gieu che sa midan, finanziaziun betg clera, concept betg cler, renfatschas da corrupziun a l'IOC e funcziunaris da federaziuns che na fetschian naginas indicaziuns cleras tge custs ch'els veglian purtar. La PS menziunescha er che plirs tozzels examinaziuns hajan mussà che gieus olimpics na dettian nagins impuls economics positivs a lunga durada, uschia fa a savair la PS grischuna.

RR novitads 14:00