Gieus olimpics: Grischun pudess avair grond avantatg

Perquai che Swiss Olympic decida gia il mars 2017 empè da l'atun 2017 davart las candidaturas svizras èn ils divers projects sut squitsch. Il Grischun dentant pudess profitar.

5 rintgs olimpics a Sotschi 2014

Legenda da maletgs: Per ils gieus olimpics 2026 datti quatter differents projects per candidaturas svizras. Keystone

Anc quatter projects svizzers èn en la cursa per ils gieus olimpics 2026. Sper la candidatura grischuna (Graubünden 2026) datti in project dals chantuns Vad e Vallais (2026 – The Swiss made winter games) e dus projects naziunals, nua ch’ils lieus ni ils chantuns n’èn anc betg enconuschent (2026 – The Games e Switzerland 2026).

Grond avantatg, sche votaziun sulet en il Grischun

Sco las retschertgas da RTR mussan vegni fitg probabel sulet a dar en il Grischun ina votaziun avant la decisiun da Swiss Olympic il mars 2017. Datti il favrer 2017 in gie dal suveran grischun, lura pudess la candidatura grischuna avair in grond avantatg envers las ulteriuras candidaturas svizras.

En questa votaziun vegn dentant sulet votà davart in credit da 25 milliuns per il process da candidatura e planisaziun. Davart l'entir project vegniss lura anc votà ina segunda giada.

Anc enfin ils 15 da december han las diversas gruppas da lavur temp d’inoltrar lur projects da candidatura a Swiss Olympic. Il mars 2017 croda lura la decisiun per ina da las quatter candidaturas. Il suveran grischun decida il favrer a l’urna davart in credit da 25 milliuns francs per la candidatura. Avant ha dentant anc il Cussegl grond da decider en chaussa en la sessiun dal december 2016.

RR actualitad 11:00