Cun dus referats ed ina runda da discussiun è l’occurrenza stada vasta. Era sch'i na ha dà en sasez nagin focus explicit, è la durabilitad da gieus olimpics en il Grischun stada en il center.
Referats e discussiun
Tranter ils circa 25 participants èn stads sper ils dus referents be trais betg commembers da la partida verd-liberala. Uschia han ils preschents vis co la partida reagescha sin ils referats dal cusseglier guvernativ Jon Domenic Parolini da la partida burgais-democratica e Reto Rupf. Rupf fa part dal team da coc ch'è responsabel per il project gieus olimpics 2026. Il professer da management da la natira a la scol’auta ZHAW a Wädenswil è pia in aderent dal project.
Economia, societad, natira
Tenor Rupf èsi pussaivel d'organisar gieus olimpics che resguardan tant il svilup economic e turistic sco la durabilitad da la natira e societad. E per exempel per Jon Carl Rauch ch’è commember da la suprastanza communala da Scuol, èsi pussaivel che gieus olimpics e durabilitad n'èn betg dispit cuntradictorics.
Svilup economic e durabel?
Dus segns da dumonda restan dentant era suenter l’occurrenza d’infurmaziun: Pon gieus olimpics promover l’economia en tut il chantun Grischun e pon gieus olimpics esser durabels? La partida verd-liberala n'ha anc betg dà ora ina parola uffiziala per la votaziun dal pievel dals 12 da favrer 2017.
L’emprim tracta il Cussegl grond ils 5 da december 2016 la missiva da la regenza grischuna che dumonda in credit da 25 milliuns francs per il project gieus olimpics 2026. Sch'il Cussegl grond approvescha quai credit datti ina votaziun.
RR actualitad 08:00
