Siglir tar il cuntegn

Header

Navigaziun

Rintgs olimpics.
Legenda: Teams regiunals duain far reclama per ils gieus olimpics. Keystone
cuntegn

Chantun Gieus Olimpics: Campagna d'aderents duai cumenzar l'emna proxima

Gia l'emna che vegn duai vegnir enconuschent tgi che fa part dals teams regiunals che fan lura reclama per gieus olimpics en il Grischun.

Il mument èsi anc avert bler quai che pertutga la candidatura. Plinavant n'èsi er anc betg cler tgi che tira il char. Tge ch'è cler è ch'i na duai betg dar in Mr. Olimpia sco la davosa giada cun Gian Gilli. I duai numnadamein dar teams regiunals che consistan ord sportists, exponents dal turissem u er da persunas handicapadas. E gia l'autra emna duai vegnir enconuschent tgi che fa part da quels, uschia Ernst Wyrsch il president da hotelleriesuisse Grischun.

120'000 francs per campagna

L'uniun tetgala d'economia dal Grischun maina la campagna ed ha uss impundì 120'000 francs vid il budget da campagna. Part da quell'uniun tetgla fa hotelleriesuisse Grischun, l'uniun da commerci, la chombra da commerci e la federaziun dals patriuns Grischuna. Sch'i vegn anc dapli daners da quella vart n'è fin uss anc betg cler.

Adversaris n'èn anc betg s'organisads

Tenor Silva Semadeni la presidenta dal comité NA a gieus olimpics en il Grischun datti probabel er questa giada ina campagna encunter. I na saja dentant anc betg cler co quella guarda ora. Cler saja dentant che las organisaziuns d'ambient én sco er gia avant quatter onns encunter. Tar la partida socialdemocratica han ins dentant anc betg decidì sch'ins fa part da la campagna, uschia il president Philipp Wilhelm. Ins saja però sceptic vers ils gieus olimpics.

RR actualitad 12:00