Siglir tar il cuntegn

Header

Navigaziun

cuntegn

Gieus olimpics 2026 Gieus olimpics 2026 – Arena da biatlon pronta e gronda avunda?

Durant ils gieus olimpics fiss Lantsch il Mecca dal biatlon. En l'arena moderna è tenor concept planisà da manar atras las diversas cursas dal biatlon. Ma è l’arena adattada per gieus olimpics? E co vesi ora cun il transport si Lai u Arosa? Èn las capacitads avunda grondas per gieus olimpics?

L’arena da biatlon a Lantsch è la pli moderna en Svizra. Il 2013 è ella vegnida inaugurada. E cun intginas adattaziuns correspundia ella er al nivel olimpic, di il schef da l’arena Silvio Baselgia.

Tribuna cun millis e millis aspectaturs

Tranter auter fissi natiralmain da bajegiar ina tribuna. En l’arena na datti numnadamain betg ina tribuna fixa. Per gieus olimpics stuessan ins probablamain construir ina tribuna cun ina capacitad da 30’000 fin 50’000 aspectaturs. Quai fissi er realistic, declera Silvio Baselgia. En questa arena hajan els immens bler plaz ed i fiss effectiv pussaivel da bajegiar ina uschè gronda tribuna. D’avair qua en l’arena ina tribuna plaina durant gieus olimpics è ina visiun dal schef da l’arena.

Lai / ArosaSan MurezzanTavauCuiraFlem / LaaxGIEUS OLIMPICS 2026ILS LIEUS DALS GIEUSTuritgKlotenNossadunnaunEngelberg

Ina sfida fiss plinavant l’entira logistica. Transportar tants aspectaturs al lieu fiss tenor Silvio Baselgia la pli gronda sfida.

Pussaivel, ma in sistem fragil

Tar gieus olimpics stuessan era vegnir transportads visitaders fin si Arosa. Quai cun il tren e cun autos. Pussaivel saja quai, declera Stefan Grass, manader da la secziun grischuna dal club da traffic e president dal comité encunter gieus olimpics en il Grischun. Il sistem saja dentant fragils. La via si Arosa saja pulit stretga. Ed il tren ad Arosa stoppia funcziunar e na dastgia pia betg esser bloccà pervi da bovas u naiv.

Hotel Sarain fiss pront

Gist a l'entschatta e betg dalunsch da l' arena da biatlon sa chatta il hotel Sarain cun 50 letgs. Per ils gieus olimpics na faschess ins naginas midadas grondas, declera l'affittader, Tom Solèr. «Nus avain avert pir dapi in mais. Gieus olimpics fissan plitost ina chaschun per rinfrestgar intginas chaussas .

Ma uschiglio essan nus pront». In maini definitiv davart ina candidatura dal chantun Grischun n' ha Tom Solèr anc betg furmà. «La fin finala savessan gieus olimpics er muntar ch'jau hai plain il hotel durant las duas emnas da la stagiun auta, cura ch'i è uschia ni uschia plain.»

RR actualitad 07:00

Argumentaziun per selecziun

Da vart da la campagna en favur da gieus olimpics 2026 en GR hai num ch'i saja da cumparegliar la candidatura grischuna cun ils gieus da Vancouver e Sotschi. Uschia vesian ins ils avantatgs da la candidatura pli pitschna ed i na saja betg pli tant impurtant nua che tge disciplina vegnia chasada.