Siglir tar il cuntegn

Chantun Gaudenz Bavier - il nov president dals Verdliberals

La radunanza ha elegì Bavier sco successur da Christian Stricker. Gaudenz Bavier ha 58 onns, lavura sco mainascola ed è dapi la fundaziun il 2008 commember da la Partida verd-liberala grischuna. El abitescha a Fläsch.

purtret da Gaudenz Bavier
Legenda: Gaudenz Bavier, il nov president dals Verd-liberals. RTR, G.C.Candinas

Reelegids en suprastanza èn l'anteriur cusseglier naziunal Josias Gasser e Jürg Kappeller, deputà dal Cussegl grond.

La Partida verd-liberala dal Grischun dovra in pau nov schlantsch, di il nov president. Igl è impurtant che er blers giuvens e giuvnas vegnian commembers da la partida. Glieud giuvna portia numnadamain nov elan e novas ideas.

Laud dals collegas

Da ses collegas da partida survegn l’um da 58 onns bler laud. L’anteriur cusseglier naziunal dals Verd-liberals, Josias Gasser, di che Bavier saja ina persuna cun blera rutina, ch’enconuschia la partida sco strusch in auter.

Per Jürg Kappeler, deputà en il Cussegl grond, èsi impurtant che Bavier haja gia in pau experientscha. Spezialmain la relaziun interumana saja fitg impurtanta sco president da partida. E quai haja il nov president.

RR novitads 23:00