Siglir tar il cuntegn

Header

cuntegn

Chantun Gabriel vul stritgar il Serneus or da Claustra

Mo pli Claustra ni tuttina vinavant Claustra-Serneus? Sch’i va tenor il cusseglier communal Albert Gabriel, lura fiss la resposta clera: il Serneus vegniss stritgà or dal num da la vischnanca en il Partenz - quai or da raschuns da gistadad.

Dapi l’entschatta da quest onn tutga il vitg da Saas uffizialmain tar la vischnanca da Claustra-Serneus. Cun l'incorporaziun da Saas han ins dentant manchentà da discutar sur d'in nov num per la vischnanca. Quai vul il cusseglier communal Albert Gabriel prender suenter.

audio
Mezdi: Claustra-Serneus u tuttina mo Claustra
ord Actualitad dals 18.02.2016.
laschar ir. Durada: 3 minutas 17 Secundas.

Esser represchentà en il num

Il vitg da Saas ha bler dapli avdants che Serneus. Perquai saja el, Albert Gabriel, sa decidì d'inoltrar ina moziun che pretenda da midar il num da vischnanca Claustra-Serneus sin Claustra ed uschia stritgar suenter prest 40 onns il Serneus or dal num da la vischnanca en il Partenz. «Igl n’è simplamain betg gist ch’ina uschè gronda part da la populaziun n’è betg represchentada en il num», è l'argument dad Albert Gabriel. Ultra da quai fiss quai pli simpel sche la vischnanca avess mo in num. Sch'insatgi tschertga per exempel la vischnanca en l'internet stuess el mo dar en in pled per chattar la vischnanca.

Idea frunta sin critica

Pauc plaschair dals plans dal cusseglier da vischnanca han dentant quels da Serneus sez. Almain sch'ins dumonda la glieud ch'ins entaupa in suentermezdi en il vitg sin via. Lura di la pli part dals dumandads ch’ins vegli ch’il num resti sco quai ch’el è il mument. Gea i dat perfin vuschs che din ch’ins veglia cumbatter quai e betg simplamain acceptar quai uschia, sch’i avess da dar ina votaziun. Ils da Saas dastgian bain gugent vegnir en vischnanca, dentant il num duaja restar.

Betg anc fatg propi in maini

Pli pauc para quai da disturbar quels da Saas sez. Ils dumandads sin via ed en fatschenta na paran betg anc propi d’avair fatg in maini sch’ins duess ussa stritgar il Serneus or dal num da la vischnanca e mo pli numnar ella Claustra. «Sche da Saas u da Serneus, nus n’avain er pauc influenza en il process da decider cunquai che nus essan pli paucs che quels da Claustra», uschia ina dunna pli passada en la staziun dal vitg. Stritgar u betg quai n’importia la fin finala nagut.

Pievel duai decider

La moziun dad Albert Gabriel, che 11 da 15 cussegliers da vischnanca han suttascrit, sto l'emprim anc vegnir discutada da la suprastanza da Claustra-Serneus. Tenor il president communal Kurt Steck, duai ella en mintga cas vegnir tractada vinavant, uschia ch'ins po lura insacura laschar decider il pievel davart il num da la vischnanca: pia sche Serneus duess restar en il num u vegnir stritgà. Cunquai ch'i sa tractia dentant d'ina midada da la constituziun, vegnia quai anc a cuzzar in mument fin ch'ins saja uschè lunsch da laschar decider il pievel.

RR Actualitad mezdi 11:00

Artitgels legids il pli savens