L'examen da velo a Cuira
En la tschintgavla classa ston tut las scolaras ed ils scolars da Cuira far in examen dad ir cun velo sin via. En quel ston els mussar d’enconuscher las reglas da precedenza ed er sco ch'ins ha dad ir tras ina rundella.
Responsabel per l’instrucziun da traffic a Cuira è René Bonderer da la polizia da la citad. El di che suenter l'examen sajan ils uffants pronts per la via e sin il pli nov stan puncto reglas da traffic. Betg adina saja quai dentant il cas tar ils automobilists.
Il dumber d'accidents
L'uniun Pro Velo avertescha: Dapi l'onn 1992 è il dumber d'accidents cun velos creschì. Dentant ch’il dumber d'accidents cun autos è sa sbassà. Quai vala per la Svizra ed er per il Grischun. Tuttina, tenor Edi Rölli da la Pro Velo Grischun è ir cun velo da principi ina chaussa segira. Ordvart cuntent è Rölli cun la segirtad da velocipedists en la principala grischuna: Qua han las mesiras dals davos onns purtà fritg en furma da fitg paucs accidents cun velos.
Sco reagir sin agressiuns sin via?
Dacurt ha il Club da Touring Svizzer TCS publitgà ina broschura davart las agressiuns sin via. La broschura dat tips ad automobilists co far per na betg sa grittentar davos la roda da palar. Savens dettia agressiuns er pervia da malchapientschas. Per exempel en rundellas, nua che velocipedists van en mez la via.
