Siglir tar il cuntegn

Chantun Flury: «Laschai las scolas en ruaus!»

La Lia Rumantscha e la Pro Grigioni Italiano èn cler cunter l'iniziativa da linguas estras. Quella iniziativa discrimineschia las minoritads linguisticas, uschè in da lur arguments.

Legende: Video La Lia Rumantscha e la Pro Grigioni Italiano cumbattan ensemen l'iniziativa da linguas estras abspielen. Laufzeit 2:17 Minuten.
Or da Telesguard dals 14.05.2018.

Quatter paginas plain arguments – la Lia Rumantscha (LR) e la Pro Grigioni Italiano (PGI) fan serius. Els na vulan betg ch'ins mida il sistem actual cun duas linguas estras en scola primara. La mira da l'iniziativa custia memia bler e schlia problems che n'existian betg, din els.

Iniziativa da linguas estras

Personen-Box aufklappenPersonen-Box zuklappen

Ils iniziants vulan ch'i vegnia be pli instruì ina lingua estra en la scola primara. En las regiuns rumantschas e talianas dal chantun vegnissan uschia be pli instruì il tudestg. Ils scolars en scolas tudestgas emprendessan englais.

Ils iniziants vulan evitar, ch'ils scolars èn surdumandads cun memia bleras linguas.

L'argument principal dals iniziants è, da betg surdumandar ils scolars cun duas linguas estras en scola primara. Tenor l'uffizi per la scola populara, hajan dentant be circa tschintg pertschient dals scolars primars inoltrà la dumonda per adattar las pretensiuns en scola. Be tschintg pertschient sajan surdumandads e quai na saja nagin motiv per midar l'entir sistem, din els.

Tema per il renum rumantsch

Johannes Flury, il president da la Lia Rumantscha, tema era per il renum: «Il rumantsch viva da la simpatia da la glieud da la Bassa. Sche nus acceptain questa iniziativa, ma din quels, che nus na vulain sez gnanc nossa lingua. Il rumantsch perdess ses renum».

Franco Milani, president da la PGI, tema dentant per la collavuraziun en il Grischun. «Co pudain nus discurrer in cun l'auter, sche nus na discurrin betg la lingua da l'auter?» di el. Tar la Viafier retica u la Banca Chantunala vegn discurrì dapli talian che englais, e quai na dastga betg ir a perder.

Campagna en planisaziun

Davart da l'iniziativa voteschan ils Grischuns e las Grischunas il pli baud il settember 2018. Per era gudagnar quella, prepara la PGI ensemen cun la LR ina campagna. Sco emprim vulan els rimnar ils arguments e planisar acziuns.

Actualitad 07:00