Siglir tar il cuntegn
cuntegn

Chantun Fitg buna chatscha da tschiervs e da chavriels

La bilantscha da la chatscha auta 2017 è fitg positiva. En bunamain tut las regiuns dovri tuttina ina chatscha speziala sin tschiervs ed en la mesadad da las regiuns ina chatscha speziala sin chavriels.

Legenda: Guardar il video I dovra era quest onn la chatscha supplementara. Durada 01:48 minutas.
Or da Telesguard dals 31.10.2017.

Ina fitg buna chatscha da tschiervs e da chavriels ed ina buna chatscha da chamutschs caracteriseschan la chatscha auta da quest onn. Tuttina dovri en bunamain tut las regiuns ina chatscha speziala sin tschiervs. Ina chatscha speziala sin chavriels è necessaria mo pli en bundant la mesadad da las regiuns.

Tut en tut han las chatschadras ed ils chatschaders grischuns sajettà 11'548 tschiervs, chavriels, chamutschs e portgs selvadis. 230 chatschadras e 5'302 chatschaders èn sa participads a la chatscha auta.

Chatscha 2017 (en parentesa las cifras dal 2016)

En parentesa las cifras da la chatscha 2016. Las cifras vegnan da l'Uffizi da chatscha e pestga grischun.

Total
masculin
feminin
Tschierv4838 (3502)2871 (2027)1967 (1475)
Chavriel3706 (3384)2214 (1978)1492 (1406)
Chamutsch
2989 (3023)1487 (1492)1502 (1531)
Portg selvadi
15 (8)6 (4) 9 (4)
Total selvaschina d'ungla
11548 (9917)

Dumber considerabel da tschiervs sajettads

A la chatscha auta tradiziunala dal settember èn vegnids sajettads 4'838 tschiervs, quai ch'è in resultat da record. Il grond dumber da tschiervs, la buna participaziun da las chatschadras e dals chatschaders grischuns sco er cundiziuns da chatscha favuraivlas han contribuì essenzialmain a quest fatg, scriva l'Uffizi da chatscha e pestga.
Cun in resultat da record da 2'871 taurs-tschierv sajettads e da 1'967 vatgas-tschierv sajettadas n'è la relaziun tranter ils animals masculins e feminins betg equilibrada. Ils dumbers da tschiervs vegnan regulads prioritarmain cun sajettar animals feminins.

Segund grond dumber da chavriels sajettads insacura

Cun 3'706 animals sajettads è il resultat da la chatscha da chavriels cleramain sur la media da blers onns. Quai mussa che la situaziun dal dumber d'animals è actualmain auta er tar questa spezia da selvaschina. Er tar ils chavriels resta la relaziun tranter animals masculins e feminins sajettads a la chatscha auta dischequilibrada.

Buna chatscha da chamutschs

Cun 2'989 animals sajettads è vegnida cuntanschida ina buna chatscha da chamutschs. Quella sa mova en il sectur previs. Tar la spessezza dals dumbers da chamutschs datti grondas differenzas regiunalas. En intginas regiuns dal chantun è danovamain vegnì constatada ina derasaziun epidemica da la tschorvadad da chamutschs.

Ina carta dal Grischun cun differentas regiuns.
Legenda: Chatscha speziala sin tschiervs. MAD

Chatscha speziala indispensabla

Pervia dals envierns miaivels dals ultims onns datti gronds effectivs da tschiervs, cunzunt en il Grischun dal nord, en il Grischun central ed en Surselva. Quels èn cunresponsabels che la situaziun da la regiuvinaziun dal guaud è per part nauscha e ch'i resulta donns da selvaschina en quest connex, en spezial en il guaud da protecziun.

Il plan per la chatscha speziala da quest onn è cleramain sur quel dals ultims onns. Durant la chatscha auta èn vegnids sajettads dapli tschiervs masculins che planisà, percunter pli paucs tschiervs feminins che previs. Perquai dovri en bunamain tut las regiuns dal Grischun ina chatscha speziala sin tschiervs.

Ina carta dal chantun Grischun cun las regiuns da chatscha speziala.
Legenda: Chatscha speziala sin chavriels. MAD

Chatscha speziala sin chavriels

Ina chatscha speziala sin chavriels è necessaria en bundant la mesadad da las regiuns. Tar ils chavriels sa concentreschan las intervenziuns anc necessarias cunzunt sin la correctura d'ina chatscha dischequilibrada tranter animals masculins e feminins sco er animals giuvens.

Per la chatscha speziala èn s'annunziads 3'406 chatschadras e chatschaders (onn precedent: 3'078). Era quai è in nov record.

RR novitads 10:00